GAIAK

HASIERAKO  OTOITZA 

Jesus Jauna, Zuk esan zenduan:
“Bi edo hiru nire izenean batuta dagozan lekuan,
han nago Ni euren erdian”.
Batzar hau zure izenean ospatu nahi dogu.
Agertu zaitez gure erdian, gure ilunak argituz
eta gure makaltasuna sendotuz.
Emoiguzuz gogo beroa eta adorea,
zure mahastian lanean jarraitzeko,
doguzan urte, mugatasun eta guzti.
Gure fede esperientzia besteengana
luzatzen jakin daigula,
Gure astia eta gure burua euren onerako eskeiniz.
Egin gagizuz bihotzez leialak eta apalak,
egia zuzentasuna eta bakea maitatu ahal izateko.
Sendotu, arren, alkartzen gaituen
kristau adiskidetasunezko loturak,
eta zabaldu gure bihotzak, gizaki guztiak Zuk maite
dozuzan lez maitatzeko

AMAIERAKO OTOITZA 

Maria, Jaungoikoaren eta gure Ama:
Kanango ezteguetan jarraibiderik
onena emon deuskun:
“Egizue Berak esaten deutsuena “.
Gaurko batzarra amaitzean,
eskerrak emoten deutsuguz,
eta argia eta indarra eskatzen,
Zure Semearen erakutsiak
zuzen ulertu eta
bizitzara behar dan lez eroateko;
gure anai-arreba diran gizakien alde
jokatu nahi dogu,
salmogilearekin esan ahal izateko:
“Zahartzaroan ere frutu emoten jarraituko dabe”.

GARIZUMA ALDIA

GARIZUMAKO III. DOMEKEA "C" 

l. Gizakiak bere ahalmenez aldatu ahal dau bere bizikerea, ohiturak, jokaerak etabar. Ez da halan-beharrez gauzak egitera behartua. Horretarako bere bizitzan egitasmo edo ideal eder bat izan behar dau, eta bere eraginez, pentsakerak eta nahierak aldatu, eta pausoak norabide barrietara begira jarri. Bestelan barruko eraginak eta inguruko haizeak noranahi eroango gaitue, behar ez diran gauza askotara eraginez. Eta...txarrena, urtean joan galduz. Garizumea aukera ederra dogu, geure eta etorri, beti txatxarkerietan denporea alperrik bizitzari sakonetik begiratzeko, Jesus aurrean dogula.

2. Garizumako bidea, kristau garean aldetik, horretarakoxe dei bat da: Jaunaren Berbearen argi tara, eta sakramentuen eraginez, geure burubideak zuzendu, moteldu jakun gogoa bizkortu eta okerbidetik urteteko, Ebanjelioko bideetara bihurtuz. Hau ezin dogu geuk bakarrean egin; lehenengo eta bat, Jaunaren argia behar dogu, otoitzean eta ekinean lortu behar doguna; eta lagunartea ere bai: hor doguz Bizian Gorako hamabosteroko batzarrak, tokatzen jakun egun osoko konbibentzia. Ez daigula ahaztu hau bakotxak geuretzat egiten dogula. Aukerak aprobetxatzeko dira; zelan jokatzen dogunaren arabera, kontuak emoteko ere bai.

. Jauna, biderako argia zaitut, 

 Zu zara nik itxaron dodan Salbatzailea. 

 Nundik norakoak dira ezkutuko bildur honeek? 

 Noren bildur naz, Jauna? 

 Bizitzea bidekurutze bat lez da, 

 eta sarri noraezean aurkitzen naz, 

 ez dakit nundik nora jo. 

 Zugan sinisten dot, Jesus Jauna, 

 Zu zara nire bizitzaren zaintzailea. 

 Nok ni ikaratu?

 . Ondo dakit Zuri jarraitzea bide latza dana. 

 Bidean zehar estropezu eta arrisku asko dodaz,

 ingurutik hara eta hona tirakada asko. 

 Baina Zurik jarraitzen badeutsut konfiantza osoz 

 bideko traba guztiak jausiko dirala, udazkeneko orbelak lez.

JESUKRISTOREN EBANJELIOA SAN LUKASEN LIBURUTIK: Lk 13, 1-9 Aldi haretan etorri jakozan Jesusi batzuk, Galilear batzuei jazotakoaren barri emoten: Pilatok Galilear hareen odola euren opariekin nahastau egin ei ebala. Jesusek erantzun eutsen: Uste dozue Galilear horreek beste Galilearrak baino pekatariago zirala, holango azkena izan ebelako? Ezetz dinotsuet; eta bihotz-barritzen ez bazaree, guztiok bardin galduko zaree”. Eta Siloe-ko torrea gainera jausita hil ziran hamazortzi hareek ere, uste dozue beste jerusalendarrak baino errudunago zirala? Ezetz dinotsuet; eta bihotz-barritzen ez bazaree, guztiok bardin galduko zaree”. Eta parabola hau esan eutsen: “Ikondo bat eukan gizon batek, bere mahastian landatuta. Eta iko-bila etorri, eta ez eban aurkitu. Orduan esan eutson mahastilariari: “Badira hiru urte, ikondo honetara iko-bila natorrela, eta ez dot ikorik aurkitzen. Ebagi egizu. Zertarako euki lurra alperrik?” Mahastilariak, ostera, erantzun eutson: “Jauna, itzi egizu aurtengoz; ingurua hatxurtu eta ongarrituko dot, ea fruturik emoten dauan. Bestela, datorren urtean ebagi egingo dozu”.  

a) Eguneroko albistariak zoritxarrez beterik jatorkuz gehienetan. Jakina, bide txarretik ibili ezkero.. Eta nor dabil beti zuzenetik? Ez ahal dogu danok zuzendu beharrik? "Bihotz-barritzen ez bazaree, guztiok bardin galduko zaree”. Orduan, ez dau balio esateak: Gu baino txarragorik bada, gu lege-barruan bizi gara... Dana dala, nor ez hobetu beharrean? Ni, zu, hori garan baino hobeak bagina, zer aldatuko litzake gure etxean, auzoan, parrokian? Garizumea ez da azaleko planta batzuk egiteko, sakonera jo eta geure burua hobetzeko baino. Kurutzean gugaitik hil Danari begiratu eta entzun egiozu, ea zer eskatzen deutzun. Bera da Garizumako bidean gidari.

 b) Jesusen ipuin parabola honek zer adierazo nahi deuskun nahiko argi dago. "Iko-bila etorri eta ez eban aurkitu". Iko arbola horren lekuan jarri bakotxak bere izena, eta bere bizitza eta ea Jesus gugandik jasoten dauan erantzunagaz konforme dagoan. Benetako santuak beti aurkitzen eben eurengan zer hobetu, zer aldatu. Beti aurkitzen eben inguruko lagunartean norengandik zer ikasi, eta bai ahaleginak egin ere honetan edo horretan, euren antzeko izateko. Guri ere etorriko jakuz holango deiak, ezta? 

 d) Urte barrian sartuta aurrera goaz. Beste urte bat gehiago bizitzan. Hau opari ederra! Baina ez alperrik galtzeko, edo denporapasa hutsean emoteko. Igaz baino hobea izan beharrean gagoz, zeozetan “Jaunaren izenean” gehiago egiteko. Bizian Gora laguntza egokia dogu: egunero errepasutxo bat, batzarretan pare gehiago hartu.. Gogoan hartu Jesusen parabolako mahastilariak esandakoa "Jauna, itzi aurtengoz; ingurua atxurtu eta ongarrituko dot, ea fruturik emoten dauan". Geure bizitzara ekarrita, zer da atxurtzea eta ongarritzea?

 OTOITZA: Zeure bihotz-ondoan landatutako landarak gaituzu, Jauna. Luzaroan zaukaguz frutu ederragoaren zain; aurten zatoz Garizumaz ni ongarritzen, hainbeste aukera eskeiniz. Eskerrik asko, Jauna, aukera guztiok gaitik; atera nagizu "betikeritik", barriztu Zeuk nire bihotzeko lurra.

GARIZUMAKO II. DOMEKEA “C”

 1. Sarri uste izan dogunez, zenbat-eta penitentzi latzagoak egin, orduan-eta santuagoa dala bat. Bai zera! Kristau fedearen helburua eta ezaugarria ez da penitentzia, sufrimentua, bizitza baino. Nok penitentzi gehiago egin ibili baino, ez al da hobe nok urkoari gehiago lagundu? Jesusen jarraitzaileen ezaugarri ez da penitentzia, baraua, bijilia etabar; Jesus ez zan penitentzizalea; bere jarraitzaile bagara, nahiko penitentzi sortuko jaku, nahiko buru-ukatze... Garizumea penitentzi egiteko baino gehiago, Jesus ezagutzeko eta Berari jarraitzeko da. Zer deritxazu?

2. Garizumeak beti ekarri deuskuz gogora barau-bijiliak, gozamen batzuek geure buruari uka tzea, eleizkizun berezi batzuetan parte hartzea etabar. Baina guzti hau bidea da, bizi barria be rreskuratzeko: garizumea ebakuntza bat lez da, biziaren alde. Baraua, penitentzia, limosnea eta otoitza aitatzen ditu Jesusek ebanjelioan; baina “Aitaren aurrean”, gelako atea ondo itxita, ezkutuan, inok ez dakiala... Ez ahaztu: Garizumea Pazkurako bidea da, bizi barriaren bila bidez bide, Jesus bera aurrean dogula. 

JAUNAGAZ NAGO, EZ NAZ GEHIAGO BILDURTUKO. . 

Jaungoikoagana jaso dot bihotza, oihuka nago, 

 Jaungoikoagana nire deadarra, entzun nagian. 

 Eta larritasunen erdian hau nire kezka eta itaun larria:

 “Betirako zapuztu ete gaitu Jaunak?

 Ez ete dogu gure alde izango aurrerantzean?

 Agortu ete da betirako Haren maitasuna? 

 JAUNAGAZ NAGO, EZ NAZ GEHIAGO BILDURTUKO . 

Lehenagoko aldietan lez, 

 gure herria ere norazean dabil, Jauna, 

 bere historiako aldi txarretan lez. 

 Gaur egun, Jauna, behartsu eta pekatari ikusten dogu geure burua; 

 ateo, sinisbako, eta haundi harroputz lez gabiz,

 mila sasijainkotxoen artean. 

 JAUANAGAZ NAGO, EZ NAZ GEHIAGO BILDURTUKO.

JESUKRISTOREN EBANJELIOA SAN LUKASEN LIBURUTIK: Lk 9, 28b-36 Aldi haretan, hartu zituan Jesusek Beragaz Pedro, Santiago eta Joan, eta mendira igon eban, otoitz egiteko. Otoitzean egoala, haren arpegia antz-aldatu eta Haren jantzia zuri diztiratsu egin zan. Honetan, gizon bi egozan Haregaz berbetan: Moises eta Elias ziran, aintzatan agertuak; eta Jesusek Jerusalenen jasan behar eban heriotzaren gainean berba egiten eben. Pedro eta lagunak loguraz erreta egozan; baina itzartu ziran eta Jesusen aintza eta Beronegaz egozan gizon biak ikusi ebezan. Honeek Haregandik alde egiterakoan, Pedrok badinotso Jesusi: “Maisu, bai ederto gagozala gu hemen! Egin daiguzan hiru txabola: bata Zuretzat, bestea Moisesentzat, eta bestea Eliasentzat”. Ez ekian zer inoan ere. Hau esaten egoala, hodei bat sortu zan, eta estaldu egin zituan, eta hodeian sartzean bildurrak hartu zituan. Hodeitik ahots bat entzun zan: “Hauxe da nire Semea, nire aukeratua. Entzun egiozue”. Ahotsa isiltzean, Jesus bakarrik egoan. Ikasleak isilik egon ziran, eta egun hareetan ez eutsoen inori esan ikusitakorik ezer.

a) Edozein gauza bizi -gizakia bera ere barruan dala- ez da helduten, bizitzaldiko gazi-gezak ondo hartzen eta beraganatzen ez baditu: biderdian arjota, edo erdieginean geldituko da. Jesus Berak ere izan zituan argi-ilunak: "Hauxe da nire Semea, nire Aukeratua. Entzun egiozue". Aitak onartzen, bedeinkatzen dau Jesus eta bere bizitza osoa. Zeuk ere izango zenduan bizitzan antzeko gozoaldiren bat: Angosto,Benidor, Gaurdamar, kurtso barruan... Kontau alkarri, ez da zeuk isilean gordeteko zerbait, Jaunak besteei laguntzeko ere emon deutsu hori.

  b) Gozoak ez gaitu hain errez aspertzen, nahizta sarri kalte egin; garratza nundik eta zelan aldenduko ibiltzen gara, nahizta sarri mesedegarri izan. Halan ikusten dau Pedrok Tabor mendian: "Maixu, bai ederto gagozala gu hemen...Ez ekian zer inoan ere". Hemen ez egoan bere Maixua ukatzeko, geroago nekaldian lez. Esperientzi bikotx hau danok dogu, geugan sarri bizi izan dogu. Gozoak ala garratzak ateraten gaitu errezago geure bidetik? Samintasunak ala gozotasunak? Nok ez dau honen esperientzirik?

d) Badira kasuak gozotasunak senetik ateraten gaituana, eta sufrimentuak senera ekarri. Gozotzasunean errez galtzen dogu neurria; sufrimentuan errez joten dogu lurra. Bien arteko ekilibrioa, oreka gordetea da gizatasun helduaren ezaugarria. Egia esan, eta geurera etorrita, Bizian Gora bidean ere laster ezagutzen dira egun bateko, aste beteko edo hamabost eguneko konbibentzietan parte hartzen dabenak eta ezinez edo atxakiz errez izten dabenak.Tabor aldiko gozaldiak beharrezko doguz, Kalbario aldiko garratzaldiak ondo eroateko. Pedro eta lagunak ere Taborren gozotasunez mozkortuta sentitzen dira; baina Pasinoko ilunpean lurjota. Ondoren, eta Espirituaren argiz lagunduta, helduten dira oreka batera, sendotasunera. “Ez esan inori ikusi dozuena, arik eta Gizonaren Semea hilen artetik biztu arte” (Mt 17,9). Geure bizitzara etorrita, zer dinosku Jesusek gaur guri?

 OTOITZA: Aitaren Seme maitea zaran Jesus! Ez zinduzan gozaldiak zorabiatu, ez nekaldiak zeure senetik atera. Gozo-garratzetara egina zengozan, bietan Aitarekin leial eta esaneko. Horretan agertu zenduan zure seme eta aukeratu izatea. Emoiguzu zeure gozotasunetik, nekaldian ere gogotsu jarraitu ahal deizugun azkenera arte. Aita ona, hartu gaizuz zeure seme alabatzat Jesusekin batera.

GARIZUMAKO I. DOMEKEA "C"

1. Garizuma! Zenbat kontu eta esperientzi datozan gure gogora Garizuma aitatzean! Haundi haundika gogoratu daiguzan batzuk. Gaurko girotik begiratuta, zetan aldatu gara onera, edo txarrera? Dana dala, Garizumea bizi beharra dogu, zelan edo halan kristau-bizitzak berak eskatzen deusku holako zeozer egin beharra. Kotxe, papera, tresna etabar ere birziklatu egiten dira; ta gizakia bera ez? Gorptzeko osasuna zaintzeko, zenbat joan-etorri eta hartuemon osagileagaz! Eta kristau bizitzari, espirituzko eginbeharrei dagokienez, zer? Behin eta betiko egin eta kito? 

 2. Kristau lez bizi beharrak, Jesusen jarraitzaile izan beharrak, ahalegin bereziak eskatzen deuskuz, gorputz-bizitzak bere ardurak eskatzen deuskuzan lez. Garizumako bost aste honeek aukera ederra doguz gure fede-bizitzan txekeo zehatz bat egiteko. Hasieratik bakotxak gogo beroz erabagi behar dau; erantzunean emoten dogu gure maitasunaren eta eskerronaren neurria, gugaitik kurutzean hil Zanaren aurrean. Garizuma bide bat dala, Jesusi hurreragotik jarraitzeko; Beragaz bizikera nasaira hil eta bizi barrira birjaioteko. Horixe litzateke birziklatzea. Penagaria izango litzateke horren preminarik ez sentitzea! Txarrago, preminea sentiduta, gerorako iztea. 

. Zaindu nagizu, ene Jainko, 

 nire gordelekua Zeugan dago eta. 

 Hauxe dinotsot Jaunari: 

ZU ZAITUT, JAUNA, ONDASUNA.

. Bizitzarako bidea erakutsiko deustazu, 

 atseginez beteko nozu zure aurrean, 

 betiko pozez zure eskumaldean. 

 Aintza Aitari, eta Semeari eta Espiritu Santuari, 

 lehen lez orain eta beti, gizaldi eta gizaldietan. Amen

JESUKRISTOREN EBANJELIOA SAN LUKASEN LIBURUTIK: Lk 4, 1-13 Aldi haretan, Espiritu Santuaz beterik bihurtu zan Jesus Jordanetik; Espirituak erabili eban basamortuan berrogei egunez, eta deabruak tentaldian jarri eban. Ez eban ezer jan egun hareetan; eta azkenean gosetu egin zan. Deabruak esan eutson: “Jaungoikoaren Seme bazara, esaiozu harri honi ogi bihurtu daitela”. Eta Jesusek erantzun: “Idatzita dago: “Gizona ez da ogiz bakarrik bizi”. Gero leku goi batera eroan eta deabruak lurreko erreinu guztiak erakutsi eutsozan une baten, eta esan eutson: “Guzti horreen agintea ta aintza emongo deutsut; izan ere, neuri emon deusteez, eta nik neuk nahi dodanari emoten deutsadaz; beraz, gurtzen banozu, zeurea izango da dana”. Jesusek erantzun: “Idatzita dago: Jauna, zure Jaungoikoa gurtuko dozu, eta Bera bakarrik serbiduko”. Orduan, Jerusalenera eroan eta jauretxeko teilatu ertzean ipini eban, eta esan eutson: “Jaungoikoaren Seme bazara, bota egizu zeure burua hemendik behera; idatzita dago-ta: “Bere aingeruei aginduko deutse zu zaindu eta onik atarateko”; eta “eroango zaitue eskuetan, zure oinak jo ez dagian harrietan”. Honan erantzun eutson Jesusek: “ Aginduta dago: “Ez tentatu Jauna, zure Jaungoikoa”. Eta tentaldiak amaituta, alde egin eban deabruak, beste batera arte”.

a) Jesus Bera dogu betiko Maixu eta gidari, batez ere Garizumako bidean: basamortuko penitentzi eta burruka gogorrean hasi eta kurutzeko heriotz latzean burutzeraino. Amaitu, ez da Kalbarioko lurpean amaitzen, biztuera pozgarrian baino. Horretarako, Jesusen erantzuna hartu gogoan: "Gizona ez da ogiz bakarrik bizi". Zer gehiago behar dau, ba? “Ogia”kasu honetan gorputz bizitzarako behar dan guztia da. Nahizta horretan nahi dan guztia euki, fededunontzat ez da nahiko. “Gogoko lekuan, ez dago aldaparik” da esaera zaharra. Bizian Gorako batzarrak aldapa gora egiten ete jakuz ba? Seinale ona litzateke? Zelango atxakiak aitatzen dira holango gauzetan parte hartu behar danerako?

 b) Munduan gabiltzala, Jainkoagazko hartuemonetan hoztu egiten gara, eta gure bihotza sasijainkotxo askoren artean erdibanatzen hasten gara errez. Garizumako jardunaldiak bideratzen gaitu, Jainkoa bere lekuan, eta beste guztiak ere euren lekuetan ipiniz: "Jauna, zure Jaungoikoa gurtuko dozu, eta Bera bakarrik serbiduko". "Gurtu", "Serbidu". ..Hor dago untzea. Ulertzen? Gauza bat da gustatzea, komeni izatea, gehiengoak egiten dauana egitea... Zetan ipiniko geunke “gurtzea”, serbitzea”?

d) Jesusek Berak erantzun eta argitu eutson deabruari zer dan gizonaren benetako janaria, betegarria: “Gizaki ez da ogiz bakarrik bizi, Jaungoikoak esaten dauanetik baino”. Egia, gauza danak dira gizakiarentzat, baina gizakia bera Jaungoikoarentzat. Hori da kristau dotrina. Jaunaren Berbeak argitzen deusku bidea, berak askatzen gaitu eta zaindu gizarteko esklabukerietatik; horrek egiten gaitu gauza guztien jabe, eta ez morroi. Hona hemen guretzat Garizumako eginbehar nagusia: Jaunaren Berbea irakurri, hausnartu, bihotzean gorde eta bizitza osoa haren erara moldatu. Bizian Gorak eskura emon deutsu Jaunaren Berba hori; Berba horixe da gure batzarretako gidari eta janari. Holan al da zuretzat? Zenbat denpora emoten deutsozu egunero?

 

OTOITZA: Jesus Maixu ona! Garizumaren hasieran, basamortuan Zeuri jarraitzera dei egiten deustazu: "Pazkuetan Nigaz batera bizibarritu nahi badozu, zatoz Garizumako bidean Neugaz batera, Aitaren Berbea entzunez, zeure burua ukatuz eta kurutzea besarkatuz. Eskerrik asko, Jesus, ez dot alperrik galdu nahi aukera barri hau. Itzartu nagizu lotatik, bixkortu nagikeritik.

URTEAN  ZEHAR

URTEAN ZEHARREKO VIII. DOMEKEA "C" 

1.- Nok esan eban hau lehenengo? Nok egin dau gehien mundua barriztu eta bideratzeko? Ez da harritzekoa fededun eta fedebakoak autortzen dogu Jesus dala munduan agertu dan gizonik haundiena. Eta aldatu dogula dinogu. Hobera ala okerrera? Gure familiak, etxeak, auzotarrakaz hartuemonak…hau danau ikusita mundu barria dala... Baina lehengoa baino hobea. Gogor egiten jaku txarrago dala esaten badogu. Zetan aztertzen dogu hobea ala txarragoa ddala esateko? Ni, zu, bestea lehengo mundu zaharrean ala gaurko barrian gara zintzoago, jainkozaleago, ongileago? Zetan esango zeunke hobetu dogula eta zetan okertu? 

 2.- Txarrena aldatu behar hau danetara zabaldu jaku: lehengo zaharra txarra; barria, gaurkoa, modakoa bada, hori da gaurkoa bestebarik? Zertan igertzen deutsazu hau edo bestea hobea dala esateko? Nor dogu horretan maisu zuzena? Lehengotik zer gelditu jaku bizirik? Zergaitik txatzat edo hobetzat botaten doguz ohitura, hartuemon eta abar? Ze ispilu jartzen dogu aurrean, JESUS bai?

On da Jaunari eskerrak emotea, 

 doizean iragartea zure maitasuna 

 eta gauez zure leialtasuna. 

 Palmondoa lez loratuko da zintzoa, 

 Libango tantaia lez haziko da; 

 Jaunaren etxean landatua, 

 gure Jainkoaren atarietan loratua. 

 Emongo dabe frutua zahartzaroan ere, 

 Mardul eta godin egongo dira. 

 iragarriko dabe zein zuzena dan Jauna, 

 nire Harkaitza, Beragan gaiztakeriarik ez daukana.

JESUKRISTOREN BARRI ONA SAN LUKASEN LIBURUTIK Aldi haretan parabola hau esan eutsen Jesusek bere ikasleei: “Itsu bat jarri ete leiteke beste itsu baten itsu-aurreko? Ez ete biak zulora jausiko? Ikaslea ez da irakaslea baino gehiago ; ondo ikasia danean, bere irakaslea haina izango da. Zetan zagoz anaiaren begiko samarrari begira, eta ez zara konturatzen zeure begian dozun hageaz? Zelan esan zeinkeo zeure anaiari: “Anaia, itzi egidazu zure begiko samarra ateraten”, zeure begiko hagea ikusten ez dozula? Itxura-zale hori! Atera egizu lehenengo zezure begiko hagea, eta orduan garbi ikusiko dozu, anaiaren begitik hagea aterateko. Ez da zugatz onik, frutu txarrak emoten dituanik; ezta zugatz txarrik ere, frutu onak emoten dituanik;. Zugatz bakotxa bere frutuetatik ezagutzen da. Elorritik ez da ikorik batzen, ezta sasitik mahatsik hartzen. Gizon onak frutu onak ateraten ditu bere bihotzeko gordailu onetik; eta gaiztoak txarra, bere gaiztotik; bihotzean ugari dagoanetik berba egiten dau ahoak”.

a.- Jesus Jaunak bere barruan euskarri sendoak eukazan. Aldaketa sakonak zabaldu ebazan, bai bizitzari buruz, bai erlijinoari buruz. Aldatu bai, baina zergaitik eta zetarako? Gizakia gero eta jakitunago doa, Jaunak bere eskuan ipini dituan dohai ederrai esker, Jaunak hasieran hor lurraren sekretuan ereindako haziak bistaratzen dihardugu gizakiok. Puntua zera da: Jainko bakarra zokoratu eta geure burua ipini dogu buru. Bere burua egin dogu Jainko, baina holan jainkotxoak ugaritu egin dira. Eta zer deritxazu: hobeto goaz? Gu lehengoak gara; lehengoa eta gaurkoa ezagutzen doguz. Zer aldaketa ezagutzen dogu, etxean, auzoan, eleizan,,,? Zergaitik aldatu zeuk? Libreago zara? Pozago bizi zara?Jainkoagana hurreratu egin zara, ala Beragandik aldendu? 

 b.- Jesusek ulertzeko moduan berba egin deusku. Jakina, bere eskolea Aitagan ikasi dau, horregaitik da zuzena, maitekorra, askatzailea, gizakia bere buruaren jabe eginaz. diruz, armaz, haundikeriz bizi dan munduak zer dinosku? Euki, jantzi, jan edanak iruntzi eta alperrik galdu, hainbeste gosez hilten ikusita… baina Jesus ez dator bat jokabide horreekaz: “Ez da zugatz onik frutu txarrak emoten dituanik; ez da zugatz txarrik frutu onik emoten dauanik; arbola bakotxa bere frututik ezagutzen da” Gero ondorenak ateraten ditu. “Gizon onak frutu onak ateraten ditu bere bihotzeko gordegailu onetik, eta gaiztoak txarrak”. Zer deritxazu Jesus maisuaren? pentsaera hau? Argiago ezin? Holango argitasunez eta zuzentasunez egiten dozuz aldaketak zeure bizitzan? 

 OTOITZA: Aita-Ama Jaingoiko laztana! Zeu zara danetatik zaharrena eta gazteena. Zeuk dakizu, inok jakitekotan zer dan gizakia eta zer behar dauan zoriontsu izateko. Zuzendu egizuz munduko jakitunak eta haundi-maundiak, eta ezagutu dagiela zu zarala Haundiena. Argitu eta sendotu bide onean gu nagusiok. Berreskuratu daiguzan gure artean galdu diran ohitura eta bide zuzenak. Ez gaizala bide gtxarretara eroan. “Atera gaioizuz gatxetik” 

URTEAN ZEHARREKO VII. DOMEKEA C     

a.- Geure esperientziz ikusten eta bizitzen dogulako gaur Jesusek dinoskuna. Eta Jesusen lurreko bidean trabarik haundienetarikoa egiten deuskuna: alkarri parkatzea, bakeak egitea. Aztertu gaurko munduaren ibilbidea eta ikuspegia: sunami antzeko hasarreak eda baztarren hondamendia sortzen dau, olatuen indarrez baztarrak hondatuz. Antzera baten agertzen jaku gaur bizi dogun mundua. Han edo hemen gerra soinua, etenbako burruka odoltsua, eta mundua zati bitan edo gehiagotan batera armagintzan eten barik. Ezin bakerik egin, bata amaitu orduko, beste bat biztuta. Giza taldeak han-hemen batera kalez kale negarrez eta oihuka bakea eta bardintasuna eskatzen, familiatik hasita, zer egoera ikusten dozu munduan eta Eleizan?

b.- Eta, besteak beste, geuk eleiz bizitzan zer ikusten dogu. Badogu bakerik, badogu bakeak egiteko itxurarik? Kale eta famili, auzo eta Eleiza…zer esaten eta entzuten da? Bakeak egin eta alkarlana bakez eta maitasunez konpontzen? Guk geuk zeri su emoten deutsogu gehiago: bakeak egiteari ala hasarreari? Zetan eta nun ikusten dogu burruka gehiago? 

Nire gogoak Jainkoagan bakarrik atsedena,

 Bera bakarrik dot harkaitz eta salbamen, 

 Nire babes; ez dot dardararik egiten. 

 Haregandik nire salbamena. 

Jainkoagan bakarrik izan egizu atseden, ene barrua, 

 Beragandik datorkidalako itxaroten dodana. 

 Bera bakarrik dot harkaitz sendo, nire iheslekua. 

 Itxaron egiziu Harengan eten barik.

JESUKRISTOREN BARRI ONA SAN LUKASEN LIBURUTIK Lk 6, 27-38 Aldi haretan esan eutsen Jesusek ikasleei: “Hauxe dinotsuet Nik entzuleoi: Maitatu egizuez arerioak; egin on, gorroto deutsuenei; bedeinkatu madarikatzen zaituenak; egin otoitz txarto esaten deutsuenen alde. Matraila baten joten zaituanari, eskeini egiozue bestea ere; eta zure soin gainekoa kentzen deutsunari, ez ukatu jantzia. Eskatzen deutsunari emoiozu; eta zure soingainekoa kentzen deutsunari, ez ukatu jantzia. Eskean datorkizunari, emoiozu; zeurea kentzen deutsunari, ez bihurtuerazo; egin besteei, eurak zuoi egitea nahi zeunkeena. Maite zaituenak maite izanik, ze esker on zor jatzue? Pekatariak ere egiten dabe beste horrenbeste. Ordaina hartzekotan aurreraturik, ze esker on zor jatzue? Pekatariak ere aurreratzen deutse pekatariei, gero ordaina hartzekotan. Zuok, ostera, maite egizuez zuen arerioak; egin on eta aurreratu, ordainaren zain egon barik, eta zuen saria handia izango da eta Goi-goikoaren seme izango zaree; Bera ere ona da-ta gaiztoekien eta eskertxarrekoekin. Izan zaitez errukiorra, zuen Aita errukiorra dan lez. Ez epaitu eta ez zaitue epaituko; ez kondenau eta zaitue kondenauko; parkatu egizue eta parkatu egingo jatzue; emon, eta emongo jatzue: neurri zabala botako jatzue altzora, eta betea, eragina, gainezkakoa. Zeuok darabiltzuen neurriaz izango zare neurtuak”. 

a.-Jesus errukiaren eta on egitearen aldedeko da. Gorrotoa eta haundikeriak kendu eta gizon-emakumeak alkar zerbitzen, alkarri laguntzen, ondasunak konpartitzen ikusi nahiago dau. Jesusen agindu nagusi eta bakarra MAITASUA da: “Maitatu egizuez arerioak, egin on gorroto deutsuenei, bedeinkatu madarikatzen zaituenak”. Zer deritxazu Jesusen bide nagusi honi? Zetarako gogoa emoten deutsu?

b.- Posible ete irakasle hobe bat? Bakotxak norbere aldetik ahalegindu ezkero…Gure hartuemonak eta `pentsakerak sarri aztertu behar doguz, ea Jesusen bidekoak ete diran. Jesus buruko pentsamentu eta bihotzeko sentimentuetaraino sartzen da. Ez dau onartzen azaleko eta itxurazko bakea, bihozetik datorren maitasunak eta parkamenak aginduta. Hau geuk bakarrean bete ezinezko agindua da. Horregaitik gure Jaunartu, otoitz egin, norbere burua Jesusen aldera bihurtu eta aurrera. 

 OTOITZA: Jesus Jauna, Zu zara munduan agertu dan gizonik haundiena, baina geu, zeure jarraitzaleok gara kaxkarrak. Jauna, bigundu gure bihotzak. Egin gagizuz errukitsu eta zerbitzari. Zeure antzeko. Gabiltzan lekuan gabiltzala zure usain gozoa nabaritu daitela ingurua. Jarraitu, Jesus laguna, gure bitartez on egiten lehenago begibistan Zeuk egiten zenduana.

URTEAN ZEHARREKO VI. DOMEKEA “C”

1. Berezkoa dogu gugan oinarrizko jokera hau: Geure bizitzaren oinarri segurua eskuratu nahia: gure osasuna, zoriona, bihar-etziko bizimodua... Hortik sortzen jakuz etenbako kezkak eta bildurrak, sarritan gehiegizkoak, gaur eta hemen daukagunagaz ez gozatzeraino, egundo zoriontsu ez izateraino. Bihar zer etorriko arduraz, gaur eta hemen doguna aintzat ez hartzeraino. Eta Jaungoikoa noizko edo zetarako? Lainoetan ala zeure bizitza barruan bizi dozu Beragazko esperientzia? 

2. Miloika asko izan dira, eta dira gaur egun ere, daukenagaz eta diranagaz konformatzen diranak; eta uste dogun baino gehiago dira, eurak daukena alkarbanatzen dabenak ere. Eta zoriontsu dirala agertzen dabe. Jesueen jarraipenean eta Ebanjelioaren argitan, beste ondasun batzuk agertu jakez. Beste bide barri bat erakutsi deutse Jesus Maisuak zoriontsu izateko. Horixe da Bizian Gora Mobimentuak daukan zeregina gure kristau bizitzan.

. Zaindu nagizu, ene Jainko, 

 nire gordelekua Zeugan dago-ta. 

 Hauxe dinotsot Jaunari:

 “Zeu zara nire ondasuna

. Lurreko jaunak eta jainkotxoak 

 ez nabe beteten.

. Jauna da niri herentzian jausi jatan ondasuna, 

 zure eskuan dago nire zoria:

 “Atal ederra suertatu jat niri, 

 betikoa da nire ondasuna”

. Onulari jatan Jaungoikoa bedeinkatuko dot,

 irakatsi egiten nau barruz. 

. Horregaitik poztu egiten jat bihotza, 

 alaitu egiten jataz erraiak, 

 eta nire haragia nasai-nasai dago:

 Ez nozu heriotzara eroango-ta, 

 zure adiskideari usteltzea ezagutzen ere 

 ez deutsozu itziko. 

JESUKRISTOREN EBANJELIOA SAN LUKASEN LIBURUTIK: Lk 6, 17. 20-26 Aldi haretan, Jesus Hamabiekin menditik jatsi eta zelai baten gelditu zan, ikasle-talde bategaz eta herriko jentetzarekin; Judea guztitik, Jerusaendik, eta Tiro ta Sidongo itsas-bazterretatik etorriak ziran-eta, Hari entzuten. Jesusek, ikasleakana begiak jasorik, esan eutsen: “Zorionekoak, behartsu zareenok; zeuona da-ta Jaungoikoaren erreinua. Zorionekoak, orain gose zareenok; asetuko zaree-ta. Zorionekoak zuok, Gizonaren Semeagaitik gizonak gorrotatzen, euren artetik botaten, eta biraoka hartzen zaituezanean, eta zuen izena lotsagarritzat baztartzen dabenean. Poztu zaiteze egun haretan eta alaitu, haundia izango da-ta zuen saria zeruetan; horreen gurasoak beste horrenbeste egin eben profetakin. Baina zoritxarrekoak zuok, aberatsok; hartu dozue zuen poza-ta. Zoritxarrekoak zuok gizon guztiak zuokaitik ondo berba egiten dabenean. Horreen gurasoak ere beste horrenbeste egin eben sasi-profetekin”.

a) Jesusen erakutsi guztien eta nagusien txorta bat eskeintzen deusku gaur Lukasek: "Zorionekoak orain gose egarri zareenok...aseko zaree-ta". Lurreko ondasun eta atseginen gainetik Jaunagaz fiatu, bere Berbea sinsitu eta gogotsu jokatzen dabenak. Ederrago diran ondasunak ezagutu ezik, ezin dira lurreko ondasunak baino goragokoen alde jokatu. Eta ondasun horreeen gose-egarria Jaunak Berak sortu behar dau gugan. Bizian Gorak emon al deutsu ondasun horeen barri? Zelan?  

b) Jakina, Jesusen erakustaldian oraingo eta geroko bizitza, biak dagoz bat eginda; hemengoa han saritzen edo zigortzen da: "Poztu zaiteze egun haretan eta alaitu, handia izango da-ta zuen saria zeruetan". Jenteak zorotzat hartzen zaituanean, hemengo ondasunen gainetik, Jesusi jarraitzen deutsozunean, begira Jesusek Berak egin ohi ebana: Aitaren arpegira begiratu eta azkenera arte jokatu. Gaurko munduko kontrako haizearen aurrean, nora begiratzen dozu? Zer jatortzu gogora?

d) Gaurko giroan, jenteari zer pentsau eta zer esan gitxi sortzen deutso mezara joateak, “Aitearen” egiteak, ohiturazko sakramenturen batzuk hartzeak. Baina inguruko haizearen kontra bizi eta jokatzeak zeresana emoten dau. Esate baterako: Gaurko ebanjelioa eta Corte Ingles-ek daukezan eskeintzak eta propagandak badauke zerikusirik alkarregaz? Eta gehienak zeinen atzetik doaz? Eta eleizara doazenak ere bai? Eta zeu? Bizian Gorak lagundu deutsu zeozetan aldatzen? 

OTOITZA: Gu Zeugaz betiko zorintsu izateko egin gaituzun Aita! Zeuk bialdu deuskuzu Jesus, benetako zoriona eta ondasuna zetan dagoan erakustera. Gehitu eiguzu Beragan sinismena eta konfiantzea; egizu jarraitu daiguzala bere bideak, zeuganatu arte. Askatu gaizuz geure barruko eta inguruko katigukeri guztietatik, zoriontasun-bideak jarraituz, zeure seme-alaba izan gaitezen.

URTEAN ZEHAREKO V. DOMEKEA "C"

1. Zeozelan adierazo behar-ta, geure erara agertzen ahalegintzen gara zer dan Jaungoikoaren Erreinua, Jaungoikoaren mundua. Jaungoikoak berak ere, geure mailara jatsi, eta geure erara, geure berbetan eta geure esperientzien argira agertzen deusku bera nor dan. Zein gatxa dan Erreinu hori dan modukoa ezagutu eta bertan sartzea! Bai, ba: bakotxak geure erara hartu eta erabili gura dogu ta! Jesusek Nikodemori “barriro jaio” behar ebala eskatu eutson. Eta guztiok gara honetan Nikodemoren lekuko. 

2. Egia esan, JESUS Bera da Jaungoikoaren Berbea. Bere bitartez agertu deusku Aitak Bera nor dan, eta zein dan bidea bere gogoko izateko. Jesusi entzun eta jarraituz, ziur dakigu egian gagozala eta Aitaren gogo beteko gareala. Bizian Gora da guretzat Erreinu horretako bideak erakusten deuskuzana, baita bide horretan aurrera egiteko indarra emoten deuskuna ere. Jakina, benetan ibili ezkero!

. Jauna, sinistezina da, 

baina osoan oratuta naukazu, 

 zure esku zabalez babesten nozu 

 eta zure-zurea sentitzen naz. 

 Basamortuan hare garautxo bat lez sentitzen naz, 

 Itsasoan gadutako ur tanta bat; 

 holantxe aurkitzen naz ni zure aurrean.

. Ene Jainko, besoak zabaldu 

 eta besarkatu nahi zaitut,

 zure itsas ertzera heldu nahi dot, 

 eta ezin ikutu ere egin zure lurra.

. Eroan nagizu 

Zeuk gure artean zabaldu dozun bide barritik. 

 Nire bizitzaren egitasmoa hortik zuzendu nahi dot,

 Eta pausoz pauso eta egunetik egunera 

 nire izatearen barrenetik Zuretzat bizi.

JESUKRISTOREN EBANJELIOA SAN LUKASEN LIBURUTIK: Lk 5, 1-11 Aldi haretan, Jesus Genesareteko itsas bazterrean egoala, eta herriak, Jaungoikoaren berbea entzun nahiez, estu inguratzen ebala, txalupa bi ikusi zituan itsas ertzean geldi; arrantzaleak sareak garbitzen ebilzan lehorrean. Sartu zan txalupa hareetako baten, Simonenean, eta lurretik apur bat urrintzeko eskatu eutson. Eta, jesarrita, txalupatik jenteari irakasten jardun eban. Berbaldia amaitu ebanean, esan eutson Simoni: “Jo itsas zabalera, eta bota zuen sareak arrantzurako”. Simonek, orduan: “Maisu, gau guztian horretantxe ibili gara, eta ez dogu ezer atara; halan da ere, zeuk dinozun ezkero, botako ditut sareak”: Eta, hasi baziran hasi ziran, itzelezko arrantzua egin eben, sareak urratzeraino. Beste txalupa-lagunei kinu egin eutsen, laguntzen etortzeko. Etorri ziran, eta txalupa biak bete ebezan, ia hondatzeraino. Hori ikusi ebenean, Simon Pedro Jesusen oinetan ahuspeztu zan eta esan eutson: “Alde egizu, jauna, nire ondotik, pekatari naz eta”. Ikareak hartuta egozan, egon ere, bera ta lagun guztiak, ataratako arrantzuagaitik; eta bardin jazoten jaken Simonen lagun ziran Zebedeoren semeei, Santiago eta Joani. Eta Jesusek honan esan eutson Simoni: “ Ez izan bildurrik; hemendik aurrera giza-arrantzale izango zara”. Hareek, txalupak lehorrera ekarri, eta, danak itzita, jarraitu egin eutsoen. 

a) Jesus gure bizitzan barruraino sartzen dan neurrian, atxaki eta eragozpen guztien gainetik joten da aurrera, Jesusen aginduetara: "Jo itsas zabalera, eta bota zuen sareak arrantzurako". Pedro kezkaz, gau osoan arrain bat bera ere ez dauala arrapatu-eta. "Baina Zeuk dinozun ezkero, botako ditut sareak". Jarrera bikotxa da beharrezkoa Jaunaren bideetan aurrera egiteko: alde batetik norbere ahaleginak egin ondoren, lortzen danaren aurrean zintzotasuna eta apaltasuna; eta bigarrena, frutua urri batzen danean, barriro ere Jaunaren deia entzun eta “bere izenean” sareak zabaldu eta jokatu. Jarrera biok gogotan hartuta, zelan sentitzen zara? Zetan aldatu behar dozu? 

b) Eta zelango arrain-sarekadea! Pedro harritu egiten da; baina Jesusek beste itsaso bat eta beste sare batzuk ipinten deutsoz aurrean: Ez izan bildunik, gaurtik aurrera giza-arrantzale izango zara". Geuregandu daigun Jesusen agindua: Zein da gure itsasoa? Zeintzuk gure sareak? Eta arrantzalea? Zelango sareak eta nun bota behar doguz Jesusen izenean? Zetarako deia jaso dozu gaur? Zer gehiago egin geinke? 

d) “Ezina, ekinaz egin”, hori dok eta! Oraindik ez doguz indarren jarri gugan doguzan dohai eta ahalmen guztiak. Kontua zera da: denporea eta indarrak ez alperrik galdu txutxerietan: “Danak itzita, jarratiu egin eutsoen”. Zenbat izteko zagoz prest? Baina Jesusen izenean eta ekintza hobeak egiteko. Zer eskatzen deutsu Jesusek? Maitasun eta zintzotasun kontua da hau 

OTOITZA: Jesus gure Laguna! Gu laguntzat hartzen gaituzun Arrantzalea! Ez neban uste ni ezertarako behar ninduzunik. Eskerrik asko, nigaz kontatzen dozulako! Eutsiz nire esku, bihotz eta dana; zeure izenean erabiliko dodaz, zeuretzat ahal diranak irabazteko. Beste batzuk nigaitik egin dabena, nik beste batzukaitik egin nahi dot. Beste askok lez dinotsut bihotzez: "Hona hemen ni, bialdu nagizu".

JAUNAREN AURKEZPENA

Gaur Urtean Zeharreko Laugarren Domekea da, baina baita JAUNAREN AURKEZKUNDEAREN JAIA ere. Eta Eleizeak, holakoetan ohi danez, domekea jausten dan jaiegunekoa eskeintzen deusku: Eta gaur, hain zuzen ere, Jesus Gure Jaunaren Aurkezpen eguna da. Moizesen aginduz, judako ume jaiobarria Jerusalengo eleizara eroan eta Jaunari eskeintzen eutsoen, ordezko saritxo bat. 

Israeldarrak, Jainkoarengandik hur-hur bizi ziran. Jainkoa zan eurentzat Salbatzailea, askatzailea; ondasun guztiak emoten eutsiezana. Horregaitik Jainkoari eskeintzen eutsiezan fruturik onenak, baita euren semeak ere. Eta horretara joan ziran Jose eta Maria JAURETXERA; euren seme Jesus Jainkoari eskeintzera… Andra Mariak, Jesus umea Eleizan sartzean, munduko argia eta salbamea aurkeztu deusku. Guk ere bere antzera, Kristo egiazko argia iragarri behar dogu.

Jaun ahalguztiduna, 

 Bera da Errege ospetsua. 

 Ateburuok, zabaldu zaiteze, 

 zabaldu zaiteze, aspaldiko ateok, 

 badator-eta Errege ospetsua. 

Nor da Errege ospetsu hori? 

 Jauna da, indartsu eta ahaltsua, 

 Jauna, guduan ahaltsua.  

Ateburuak, zabaldu zaiteze, 

 zabaldu zaiteze, aspaldiko ateok, 

 badator-eta Errege ospetsua. 

Nor da Errege ospetsu hori? 

 Jaun ahalguztiduna, 

 Bera da Errege ospetsua.

JesuKristoren Ebanjelioa San Lukasen liburutik: Lk 2, 22-35 Moisesen Legearen arabera, amari garbikuntza egiteko unea heldu jakonean, gurasoek Jerusalemera eroan eben Jesus, Jaunari aurkezteko. [Izan ere, honan dago aginduta Jaunaren legean: «Lehen-seme guztiak Jaunari sagaratuko jakoz». Jaunaren legean ezarritako oparia ere eskeini behar eben: «Usapal bi edota usakume bi». Bazan Jerusalemen Simeon izeneko gizon bat, gizon zintzo eta jainkozalea, Jainkoak Israel noiz kontsolatuko zain egoana. Espiritu Santua beragaz eban, eta aditzera emon eutsan ez zala hilgo Jaunaren Mesias ikusi arte. Eta Espiritu Santuak eraginda tenplura joan zan. Gurasoek Legeak agintzen ebana beteteko Jesus umea tenpluan sartzean, hartu eban Simeonek umea besoetan eta Jainkoa bedeinkatu eban, esanez: «Orain itzi daikezu, Jauna, zeure morroi hau bakean hilten, Zeuk agindu zenduan lez. Ikusi dabe nire begiok Zugandiko salbamena, herri guztien aurrean Zuk aurkeztua: Nazinoak argitzeko argia eta zure herri Israelen ospea». Umearen aitamak harriturik egozan umeagaitik esaten ziranakin. Eta Simeonek bedeinkatu egin zituan, eta umearen ama Mariari esan eutsan:«Begira, hau israeldar asko jausteko eta beste asko jagiteko ipinita dago; eztabaida sortzen dauan ezaugarri izango da, holan bihotz askotako asmoak agirian gelditu daitezan. Eta zeuri ezpata batek aldez alde zulatuko deutsu arimea».

a) ”Moixesen legearen arabera, gurasoak Jerusalenera eroan eben Jesus, Jaunari aurkezteko”. Ordurarte, pekatuak, beragaz dakarren ilunpean bizi izan gara. Andra Mariak, Jesus Umea Eleizan sartzean, munduko argia eta salbamea aurkeztu deusku. Zer izan behar dau orain gure erantzuna? 

b) Ondo be ondo dakigu danok, gure mundua ilunpe haundi baten itzaltasunean bizi dana eta Jesusek MUNDUKO ARGIA IZATEKO DEITU DEUSKUNA ELEIZA LEZ. Baina bere laguntza barik guk ezer ezin dogu egin. Zertan behar dogu BERE laguntza? Zelan eskertu hau danau?

d) “Orain itzi zeinke, Jauna, morroi hau bakean joaten, Zeuk agindu zenduan lez, ikusi dabe nire begiok Zugandiko salbamena, herri guztien artean ipini dozuna: atzerriak argitzeko ipini dozun argia eta zure herri Iraelen edergarria”. Holango bikoteak senar-emazteak benetan dira beneragarriak, etxeari eusteko haberik sendoenak. Eta Maria amak zer? Zer hartuko ete eban bihotzean?

OTOITZA:Jesus Jauna, Zu zara gure bizitzak argiz betetzen dituan argia. Zure bizitza osoa munduko iluntasunak kentzen emon zenduan: tristuraren iluntasunak, pozaren argiaz argitzen gaixotasunaren iluntasunak, osasunaren argiz argitzen bakardadearen iluntasunak,adiskidetasunaren argiaz argitzen haserrearen eta eztabaidaren iluntasunak bakearen argiaz argitzen heriotzaren iluntasuna, bizitzaren argiaz argitzen. Zure bizitza osoa, Aita Jainkoari eskeini zeuntson munduarentzat, gizon-emakume guztientzat argi izateko. Emoiguzu guztioi zure argi horretatik.

URTEAN ZEHARREKO III. DOMEKEA “C”

1. Zenbat buru, hainbat aburu; eta zenbat liburu? Etxeko apalak bete inguru. Denporapasa edo jakinminez. Hobeak izan guraz ezer irakurten al dogu? "Esaidazu zer irakurten dozun, eta igarri baietz nundik nora zabiltzan”. Kristauaren LIBURUA BIBLIA da, izan; baina zenbat etxetan ikusten ete da?. Eta ikusten danetan ere zenbat hauts gainean? Zuk lehen baino zenbat gehiago irakurten dozu gaur Biblia?

2. Hortik-edo, gaurko jokoa honetan datza: Nok gehiago jakin, nok liburu haundi, ederragoak euki; baina nor hobea izan, nok on gehiago egin? Zeuk zer uste dozu? Irakurten dana burura bakarrik badoa, han gelditzen da, ez dauka bizitzagaz zerikusi askorik; baina bihotzeko errotara jasten dana bakarrik bizi bihurtzen da. Orduan emoten jako Berbeari bizitzatik erantzuna. Areago Jaunaren Berbea danean: Jaunaren Berbeak beragan dakar bizia, lur onean jausten bada, bizi bihurtzen da gugan.

  . Pozik sentitzen naz. 

 Nire bihotza Jaunagan pozten da. 

 Bere salbamena ospatzen dot. 

 Nik, Jauna, barre egiten deustet nire arazoei, 

 Nigan zure salbamena ospatzen dot eta.

. Zu santua zara, zuzena, 

 Zugan dana da armonia eta batasuna. 

 Zugan sendo sentitzen naz, 

 oinak harkaitz gainan lez. 

 Zu barik ez naz seguru sentitzen,

 oinak hondar gainean lez. Zu nire Harkaitz!

JESUKRISTOREN EBANJELIOA SAN LUKASEN LIBURUTIK: Lk 1, 1-4; 4. 14-21 Teofilo agurgarri hori: Asko ahalegindu dira, gure artean jazotakoen kondaira idazten, hasieratik euren begiz ikusi eta gero berbearen serbitzari izandakoak jakinazo euskuenei jarraituz. Nik ere, hasieratik guzti honeek ardura haundiz aztertu ondoren, danak hari egokian zuri idaztea erabagi dot, hartu dozuzan irakatsien egia ezagutu dagizun. Aldi haretan, Jesus, Espirituaren indarrez,Galileara bihurtu zan, eta Haren izena lurralde guzti haretan zabaldu zan. Hango sinagogetan irakasten eban, eta danak goratu egiten eben. Jesus Nazaretera joan zan, Bera hazi zan herrira, eta zapatuetan ohi eban lez, sinagogan sartu zan eta zutunik jarri, irakurgaia egiteko. Isais profetearen liburua emon eutsoen. Liburua zabaldurik, profetearen berba honeek aurkitu zituan: “Jaunaren Espiritua nigan dago, Berak igurtzi nau-ta, behartsuei barri ona emoteko. Katiguei askatasuna eta itsuei ikusmena iragartera bialdu nau, zapalduei askatasuna emotera, Jaunaren grazi-urtea iragartera”. Liburua hartu ondoren, laguntzaileari emon eutson, eta jesarri egin zan. Sinagogan ziran guztien begiak Hari begira-begira egozan.Bera honan hasi jaken berba egiten: “Gaur bete da, orain entzun dozuen Liburu Santuko berba hau”: 

a) Jesus Biblia zale itsua zan; txikitatik etxean ikasi eban gehiena buruz. Eta, batez ere, bihotzez. Gaur Nazareteko Sinagogan ikusten dogu: zapatua zanez, besteekaz alkartu, Liburu Santua hartu, irakurri eta beraganduten: "Jaunaren Espiritua nigan dago, Berak igurtzi nau-ta, behartsuei Barri Ona emoteko...Gaur bete da orain entzun dozuen Liburu Santuko berba hau" Hori da Berbea norbere haragi bihurtzea, bizitzara ekarriz. Bizian Gora Biblia-eskola ona al dogu? Irakuten al dozu etxean tokatzen dan Biblia zatia? Egiten diran itaunei erantzuten ahaleginduten al zara?  

b) Jaunaren Berbea ez da letra hutsa eta hotza, Espiritu Santuaren indarrez beterik dator gugana; bihotzean leku emotea nahiko da, berak dinona gugan sortu eta egiteko. Zetan igarri, bihotz-zabalik entzun dogun ala ez? "Behartsuei Barri Ona, katiguei askatasuna, eta itsuei ikusmena" Hori eta gehiago egiten dau gugan Jaunaren Berbeak, behar dan lez entzun ezkero. Gaurkotu eta norberagandu egiten da. Horixe eta horretarakoxe da Bizian Gora. Zer esperientzia dozu?

d) Jesusen erakutsi hau gitxitan aztertzen dogu: Berak Liburua hartu eta irakurri egiten dau Nazareteko sinagogan: parte hartu batzarrean, laiko hutsa izanik. Gainera, Jaunaren Berbeak Berari esan deutsona besteei agertu, eurentzat ere aberasgarri izan dedin. Horretarako batzen gara gu ere Bizian Gorako batzarrean. Eroaten al dozu etxetik batzarrera, Jaunaren Berbeak etxean zeuri esan deutsuna? Konpartitzen al dozu lagunartean?

 OTOITZA: Jaungoiko ona: gizaldietan zehar agertu deuskuzu zure maitasuna, zure nahia, zure bideak profeten bidez, batez ere Jesus zeure Semea gugana bialduz. Emoiguzu zure Berbearen egarri bizia, egunero erabili daigun eskuartean, ahoan eta bihotzean. lxuri eiguzu zure Espiritua, zure Berbea ulertu daigun, eta indarra, bete ahal daigun. Aintxinakoak lez dinogu bihotzez: Bai, entzun dogu Jaunaren Berbea, eta beteko dogu. 

 URTEKO ZEHARREKO II. DOMEKEA "C" 

 1. Urte Zahar-Barri inguruko jaialdia joan da eleiz-liturgian ere; "Urtean Zeharreko Domekak" hasi jakuz. "Urtarrileko aldazgora" sarri darabilgu aho minetan. Hor hasi bai, eta arnaitu noiz? Urte osoa, bizitza osoa da aldazgora neketsua. Horregaitik, biderako lagungarriak beharrezkoak doguz. Baita kristau bizitzan ere. Batez ere, gaur lango krisialdiak joten gaituanean; argia eta indarra beharrezkoak doguz, egoerak ondo aztertu eta egin behar diran aldaketak egin ondoren, gogotsu aurrera joteko. Gu Nagusiontzat BizianGora aproposko laguntza da. 

 2. Bide luzeko aldazgora dogun bizitzan, egoki datorkuz bideko lagun onak, atsedenaldiak; batez ere, Jainkoaren argia, Espiritua. Beste gauza askotan lez, kristau garean aldetik ere kontuak atera behar doguz: zer laguntza behar ete dodan biderako. Kontua zera da: bizitzako beste arazo askotan lez, kristau bizitzan ere hobera jo behar dogu; betikoak betiko modura eginez, ezin dogu aurrera egin. Aukera ederra eskeintzen deusku Jainkoak aurtengo urte barriagaz, ihaz baino hobeto jokatzeko.

 . Zutaz fiatzen naz, Jauna, 

 sarri zoritxarreko eta bakarrik sentiduarren; 

 Zutaz fiatzen naz, Jauna, 

 nire porroten aurrean, 

 urtenbide faltsoak askok eskeiniarren. 

 . Zure presentzian ibili nahi dot,

 zure Berbearen argitara;

 Zure presentzian ibili nahi dot, 

 zure Ebanjelioan bizitza oinarrituta.

 . Eskerrak Zuri, Jauna, zure ikasle naz, 

 zure egitasmoaren jarraitzaile; 

 hemen naukazu kurutzea lepoan dodala, 

 bidean aurrera, egunez egun, pausoz pauso;

  ni Zugaz noa eta zure deiari erantzuten 

 zintzoa izan nahi dot 

 JESUKRISTOREN EBANJELIOA SAN JOANEN LIBURUTIK: Jn 2, 1-12 

 Aldi haretan, ezteguak ziran Galileako Kanan, eta Jesusen Ama han zan. Jesus ere deitua izan zan, bere ikasleakaz. Ardaoa amaitu zan, eta esan eutson Jesusi bere Amak: “Ez dauke ardaorik”. Eta Jesusek erantzun: “Eta guri zer ardura deusku, emakume. Nire ordua ez da oraindino etorri”. Orduan, amak morroiei: “Egizue Berak esaten deutsena”

. Harrizko sei ontzi egozan han, judeguen ohituraz eskuak garbiteko ipinita, ontzi bakoitza ehunen bat litrotakoa. Jesusek esan eutsen: “Bete egizuez ontziak urez”. Eta hareek goraino bete ebezan. Jesusek barriro: “Atara orain, eta eroan mahai-zainari”. Eta hareek eroan eutsoen. Probau eban mahai-zainak ardao bihurtutako ura, nondik ekarren jakin barik (morroiak, bai, baekien, eurak atara ebelako); orduan, ezkonbarriari deituta, esan eutson: “Ardao ona guztiak hasieran ataraten dabe; eta edanda dagozanean, orduan txarra. Zuk, ostera, oraintxe arte gorde dozu ardao ona”

. Holan, Galileako Kanan egin zituan Jesusek bere lehenengo ezaugarriak; bere aintza agertu eban, eta sinistu eben Haregan bere ikasleak. Ondoren, Kafarnaunera jatsi zan, eta Beragaz bere ama, bere senideak eta bere ikasleak; eta han egon ziran, baina ez egun asko. 

 a) Jesusek Kanan egindako lehenengo miraria gogoan dogu. Egin, osotu Jesusek egin eban, baina ze parte izan eben Mariak, morroiak, mahaizainak eta besteak? Izan eben parterik mirari honetan? “Egizue Berak esaten deutsuena”. Eurak ezetz erantzun baleutsoe, zer? Eta gaurkora etorrita, geuk ezetz esan beharrean, baietz esango bagendu, zer aldatuko litzateke: etxean, auzoan, parrokian, herrian?

 b) Jesusen mirariak ez dira harrokerizko erakutsi batzuk, gizaki osoa osatzera zuzenduak dira: negarra dagoan lekuan poza, gorrotoa dagoan lekuan parkamena, bakardadea dagoan lekuan, alkarlaguntza. Era honetako mirariak ez ete geinkez egin geuk ere geure artean? “Ez dauke ardaurik”. Horren ordez jarri daigun: Ez dauke pozik, ez dauke lagunik, ez dauke gaixoak nok zaindu... Eta holango bati egindakoa Jesus Berari egindakotzat hartuko deuskula dinosku. Gaurtik aurrera zer egiteko asmoa hartzen dozu, Mariaren esanera?

 d) Jesusen miraria ez zan izan bakarrik ura ardau bihurtzea; horregaz ez eban bakarrik ardau egarria ase: “Sinistu eben Harengan bere ikasleak”. Lehenengoa ezaugarria da, bitarteko bat, bigarrena lortzeko. Zer egiten eban Jesusek ardauz beteaz bakarrik? Gizakia gorputz ta espirituz ase, gozatu, osatu. Gu garan baino ekintzaileagoak bagina, urkoaren aldeko ezaugarri batzuk egingo bagenduz, ez ete leukie gehiagok sinistuko Jesusengan? Horra Mariaren agindua: “Egizue Harek dinotsuena”. Hori da benetako debozinoa: Gaixo eta behartsuen mahaian zerbitzari izan.

 OTOITZA: Maria, Ama laztana, geure batzarrera deitzen deutsugu. Begira zer falta jakun, Jesusen jarraitzaile zintzoak izateko, eta erregutu gure alde Jesusi: Gehitu dagiala gugan fedea, itxaropena eta maitasuna. Bizian Gora lagun dogula, geure ontzietan hartu dogun ardau barria zabaldu daigula, bake eta poz egarri diran askoren artean. Kontau egizu, Maria, zerbitzariokaz ere maitasun miraritxoak egiten jarraitu daigun.

 

ABENDUKO 1. DOMEKEA

ABENDUKO I.  DOMEKEA   "C" 

SARRERA

1. Abendua: Etorrerea. Jainko Semeak guganaino egin eban etorrerea. Eta, jakina, etorrera honek urteera bat eskatzen dau; bestelan, ez jaku helduko, edo lotan aurkituko gaitu. Jesusek gure bila urteten dauan lez, guk ere bere bila urten egin behar dogu. Bidean goazela egin behar dogu topo Jesusek eta gutariko bakotxak; geldi egonda, ez dago bat egiterik, ez dago jaiotza barririk. Bizian Gora aukerako laguntza dogu beti etorten dagoan Jesusegaz bat egiteko.

2. Abenduko lau aste honeek bide-erakusletzat hartu behar doguz: Jaunaren Berbea lagun, astez-aste joango gara itxaropenez bere bila. Horretarako itxaropenez jokatu behar dogu: geure aldetik egin behar doguna egiten  badogu, Jesusek egingo dau Berak guganuntz egin behar dauan bidea. Hori da gure itxaropena, eta ondorioa benetan gogo betekoa izango da: ZORIONA. Hau izango da gure bihotzak pozez beteko deuskuzan Gabonetako loteria. 

. Jauna, Zugana jasoten dot bihotza;
ene Jainko, Zugan dot uste on;
ez nadila lotsatu.
Zugana nator ihesi, Jauna,
neure pobretasunaren hondotik,
Zeuganaino heldu nahirik hegaz.

. Zeu zara nire Jaungoiko eta Salbatzaile,
eta, Zeugan goizero itzartzean,
zeure edertasunez asetzen nozu,
eta egun guztira zure maitasunean murgiltzen naz.
 

. Errukiz begiratu nire makaltasunak,
Zeuri oratuten deutsut-eta,
erruki nitaz zure maitasunez.
Zuk ondo dakizu maite-maite zaitudana.
Nire begiak Jaungoikoagan daukadaz.
Beragan oinarritzen naz,
nire maitasunak Haregan dau oinarria.
  

JESUKRISTOREN EBANJELIOA SAN LUKASEN LIBURUTIK: Lk 21, 25-28. 34-36 

           Aldi haretan holan esan eutsen Jesusek bere ikasleei: “Ezaugarriak izango dira eguzkian, iretargian eta izarretan; estu ibiliko dira lurrean herrialdeak, itsasoaren orroaz eta olatuen indarrez zoratuta. Gizakiak arnasa barik geldituko dira, munduari gainera datorkonaren bildurrez, zeruko indarrak ere dardaratu egingo dira-ta.

 Orduan ikusiko dozuen Gizonaren Semea indartsu eta aintza handitan etorten hodei baten. Guzti hori jazoten hasten danean, zutundu zaiteze eta jaso zuen buruak: hurrean da zuen askatasuna. Egon zuhur; ez beitez moteldu zuen bihotzak ordikeriaz, mozkorkeriaz, eta bizitza honetako arduretan; ez bekizue egun ha ustekabean gainera jausi, sarea lez etorriko dalako lurrean bizi diran guztien gainera. Egon, ba, beti zuhur, eta egin otoitz, etorri behar daben guzti horrei ihes egin ahal deioezuen, eta zutunik egon ahal zaitezen, Gizonaren Semearen aurrean. 

a) Norantza doa gaurko mundua? Batek baino gehiagok uste dau azkenera doala. Gu, ostera, ez gara muskilduta geratzen dan jentea. Guk hondamendiaren erdian LAGUN BAT ikusten dogu zutunik: "Orduan ikusiko dozue Gizonaren Semea (Jesus) indartsu eta aintza haunditan etorten hodei artean". Guk abenduan Jesus horixe ikusten dogu, baina makal eta pobre, askatxo baten. Geure antzeko eginda, Berari jarraitzera deitzen deusku. Prest al zagoz? Zer aldatu behar zeunke, bere antzeko egin eta jarraitzeko? (Isildu eta konpartidu).

b) Jaunaren Berbeak abenduko lehenengo domekan dei eta dei egiten deusku: "Zutundu zaiteze, jaso zuen buruak, egon zuhur...ez beitez moteldu zuen bihotzak...egin otoitz..." Ordikeriak, mozkorkeriak, larregizko munduko ardurak... aitatzen deuskuz. Honeik dira egin behar doguzan benetako barauak; kontsumoaren deiak bestelakoak dira, datorren Mesiasen kontrakoak. Kontsumoak batu eta batu aginduten deusku, Mesiasek banandu eta banandu. Abendua orretarako da: Mesias hori ezagutzea, gure bideak bere bideetara hurreratzeko. Bizian Gorak hainbat aukera eskeintzen deutsuz. Zeintzuk aukera? (Isildu eta konpartidu)

d) Esaerea da, azkenean kukurruku egiten dauanak irabazten dau. Hemen eta orain edozer esan eta egitea erreza da, baina nora goraz bide honek? Pertsona zintzoagoak, askeagoak, laguntzaileagoak izatera? Jesusek argi dinosku: “Zutunik egon ahal zaitezen, Gizonaren Semearen aurrean”. “Zutunik”, zutunik bizi, gizon eta kristau lez; ez narras eta erdilotan. Zer da zuretzat Jaunaren aurrean zutunik bizitea? (Isildu eta konpartidu)

OTOITZA: Zatoz, Jesus Salbatzailea! Zatoz gugana. Geuk ere Zugana bidez-bide urten nahi dogu­-ta. Zeugaz topo egin nahi dogu aurtengo abenduko bidean: horixe izango da aurtengo "jaiotza" ederrena. Jausi bekigu, Jesus, zure jaiotza biziaren loteria. Ahal dogun dana jokatu nahi dogu, loteria horren alde. Zatoz, Jesus! Gaur inoiz baino beharrezkoagoa zaitugu

ABENDUKO 2. DOMEKEA

ABENDUKO II. DOMEKEA       "C"

SARRERA

1.           Abenduko bidean MARIA dogu bidelagunik onena; Bera prestau zan ondoen Jesusen jaio­tzarako. Andra Maria Sortzez Garbia, horra Jainkoak Jesusentzat sortu eban ama barria. Maria, bera ere, bere aldetik gogo beroz prestatu zan: "Hona hemen Jaunaren mirabea". Bizi gaitezan abenduan Mariaren ondoan, Jesusen Jaiotzaren eguneraino. Bizian Gora dozu biderik onena zugan “jaiotza barri” gauzatu dedin.  Hor doguz geure batzarrak eta... Oruen “abenduko konbibentzia”. Merezi dau, ezta?

2.           Jaunaren aldetik gogoz eta fedez entzuten dogu: “Banator”. Guk geure aldetik ere bardin erantzun behar: “Banoa”. Jesus Aitak bialdua da, zuretzat eta niretzat ere bai; orduan lez, gaur ere bidera urten behar: itxaropenez, zirkin egin, bestetan baino zertxobait gehiago ahaleginduz. Bizian Gorak hainbeste aukera eskeintzen deusku. Guk sikiran hauxe egin daigun inoiz baino gogotsuago; gainerakoa Espiritu Santuak egingo dau gugan, Mariagan lez. Egitez agertu daigun, benetan sinisten dogula.

Bidez-bide doan Eleizan alkartuta,
Ondasun guztiak opa deutsoguz alkarri!
Bidez-bide doan Eleizan alkartuta,
Gaixo eta behartsuei maitasun-indarra eroatera
Konprormetitzen gara Jesusen izenean.
Bidez-bide doan Eleizan alkartuta,
oraindik ez daukazun bakea opa deutsugu, anai-arreba!

. Emoiguzu zure bakea, anai-arreba,
benetako pobre-bihotza dakazun horrek!
Emogizu zure bakea, anai-arreba,
garbi, zuzen eta zintzo zaran horrek!
Emoiguzu zure bakea, anai-arreba,
errukitsu eta bihozbera zaran horrek!
Emoiguzu zure bakea, anai-arreba,
Bihoitzez otzan eta apala zaran hotrrek!

JESUKRISTOREN EBANJELIOA SAN LUKASEN LIBURUTIK.  Lk 3, 1-6

         Tiberio errege nagusi zala, haren erregetzaren hamabosgarren urtean, Pontzio Pilato Judeako agintari zala, eta Herodes Galilean errege-ordeko egoala, eta Filipo -haren anaia- Iturea eta Trakoni lurraldean errege ordeko, eta Lisania Abilen-en errege-ordeko, eta Anas eta Kaifas abade nagusi zirala, Jaungoikoaren berbea etorri jakon basamortuan Zakariasen seme Joani.

 Eta Jordan inguru guztian, bihotz-barritzeko bateoa iragarten hasi zan, pekatuen parkamenerako, Isaias profetaren liburuan idatzita dagoan lez: “Ahots bat oihuka dabil basamortuan: urratu egizue bidea Jaunarentzat, zuzendu Haren bide-zidorrak; goratu daitezala ibarrak, beheratu mendi ta tontorrak; bardindu daitezala konkorrak; zelaitu aldatzak. Eta ikusiko dabe guztiak Jaungoikoaren salbamena.

a) Inguruko giroari begira jarrita, zer ikusten eta entzuten da; zer dinoskue eta irratiak eta telebistak Gabonei buruz? Zelan prestau behar gareala? Nor datorrela? Eta guk geuk zer dinogu? Entzun deiogun Joan Bateatzaileari: "Bihotz-barritzeko Bateoa iragarten hasi zan". Guk hartuta daukagu bateo hori; baina­ bihotz-barritzeko etenbako ekintza eskatzen dauan bateoa bai gero?. Bihotza barriztu”: neu eta neure bizitza osoa barrutik aldatu, orduan suertatzen da jaiotza barria. Zelan bizibarritu behin zahartzarora ezkero? (Isildu eta konpartidu)

b) Aitita-amamoi sarri tokatzen jaku oihu egin beharra, eta gehienbaten "basamortuan", Joani lez, inok entzun gura ez dauan lekuan: “Ahots bat oihuka dabil basamortuan: Urratu egizue bidea Jaunarentzat, zuzendu Haren bide-zidor­rak". Abenduan aurrera goazela, ze oihu egin behar dogu guk nagusiok? Derrigor zaratea egin behar ete da? Zeintzuk dira egin behar ditugun oihuak, eta zelan egin? Zelango “oihuak” egin leikez gu lango aitita-amama batek, Jesusen izenean? (Isildu eta konpartidu)

d) Gabonetako loteriak urtengo deuskula seguru bagengoz…  Seguru egon ezta be, zenbat miloi jokatzen dan, badaezpadan. Eta kristau lez, Jesus gu salbatzera datorrela eta, zenbat jokatzen dogu? Zenbateraino sinisten dogu hori guk? Begira zer jokatzen dogun: “Eta ikusiko dabe guztiak Jaungoikoaren salbamena”. Salbamena, hau da: bakea, bizipoza, barruko bake sakona, gerorako itxaropen sendoa... Baina zehatz esan deusku bete behar doguna: “Urratu egizue bidea Jaunarentzat, zuzendu Haren bidezidorrak; goratiu daitezala ibarrak, beheratu mendi ta tontorrak”. Hori da guk jokatu behar doguna, loteri eder hori eskuratzeko. Zer da “Jaunarentzat bideak urratzea”? “Bidezidorrak zuzentzea”? Mendi eta tontorrak beheratzea? (Isildu eta konpoartidu)

OTOITZA: Bazatoz, Jauna, nigana, nire etxera; nire bizitzan sartu (jaio) nahi dozu. Neu ere prestatzen nago, Jesus, Zeuri bidera urteteko. Maria, lagun egidazu; zeure antzera, neu ere prestau nagizu Jesus hartzeko. Gabon jai biziak eta zoriontsuak ospatu nahi ditut. Zatoz, Jesus ona!

ABENDUKO III. DOMEKEA  “C”

SARRERA

1. Abendua itxaropen-aldia dala esan dogu; itxaropen-aldian bizi dana, arduraz baina alaitasunez bizi da. Izan ere, abenduan itxaroten doguna JESUSEN JAIOTZA da. Gogoratzea besterik ez dago etxean eta senitarte osoan izaten dan alaitasuna, ume barri bat itxaroten danean! Gugana datorren ume txikia JAUNGOIKO HAUNDIA da, txikitasunez eta maitasunez geure tamainukoa eginda. Hainbeste zarata eta ikuskizunen atean, ez al dogu ahaztuko Ume txiki haundi honen etorrerea! Arrisku itzela dago!

2. Zahartzaroan burua arindu egiten ei da; baita zentzuna argitu eta bihotza berotu ere, Espiritu Santuaren laguntzaz. Jubilatu alaia eta umore onekoa edonun da maitagarri; eta bat eta bi baino gehiago dira edu honetakoak gure artean. Jesus noiz jaioko bizi dan Mariak bizipozez  bete gaizala. Kristau garean aldetik ere, Gabonaldia pozezko ospakizuna da. Bizian Gorak ere eskeintzen deutsu aukerarik asko horretarako. Ez daiguzan alperrik galdu.

. Zu zara, Jauna, nire bihotzaren poza eta zoriona betiko.
Zu haundia zara, baina nigaitik txiki egina,
nire existentzia asebeteteko hainakoa. 

. Zugan sinisten dabenakaz bat eginda dinotsut:
Gurtzen zaitut, Jauna!
Zugan itxaroten dabenakaz bat eginda dinotsut:
Zugan itxaroten dot, Jauna.
Bihotzez maite zaituenakaz bat eginda dinotsut:
Maite zaitut, Jauna. 

. Zu zara nire zoriontasuna.
Zugaz bat eginda bizitzea da nire loteria.
Zure graziz eta leialtasunez
pozez beteten nozu egunero.
Bedeinkatzen zaitut, Jauna,  nigana zatozalako. 

JESUKRISTOREN  EBANJELIOA  SAN LUKASEN  LIBURUTIK: Lk 3, 10-18

         Aldi haretan, honan itaunduten eutson jenteak Joani: “Zer egin behar dogu?” Eta harek erantzun: “Soineko bi daukazanak, emon begio bat ez daukanari; eta jatekorik daukanak, bardin egin begi”.
         Etorri jakozan zergalari batzuk ere, bateoa hartzera, eta itaundu eutsoen: “Maisu, zer egin behar dogu?” Eta berak esan eutsen: “Ez eskatu erabagita dagoana baino gehiago”.
         Gudari batzuk itaundu eutsoen: “Eta guk zer egin behar dogu?” Berak erantzun: “Ez behartu inor gogorkeriaz; ez ibili salaketan, dirua atarateko; konforme izan daukazuen irabaziagaz”.
         Herria kezkatan egoan, eta euren barruan itaunka, Joan hori ez ete zan Kristo berbera. Joanek honan erantzun eutsen guztiei: “Nik urez bateatzen zaituet; baina badator ni baino ahaltsuagoa dana, ni ez naz inor Haren oinetakoen lokarriak askatzeko ere-ta. Harek Espiritu Santuaz eta suz  bateatuko zaitue. Eskuan dauka sardea, larraina garbitzeko eta garia bere garautegian batzeko; lastoa, barriz, amatau ezin leiteken sutan erreko dau”.
         Honeek eta beste gauza asko esanez, barri ona irakasten eutson herriari.

a)   Jesusen jaiotza norberagan prestatzen diharduanak benetan egiten dau judegu zintzoak egiten eben itaun bardina: "Zer egin behar dogu?" Eta Joanen erantzuna: „Soineko bi daukazanak, emon begio bat ez daukanari; eta jatekorik daukanak, bardin egin begi“. Jesus Umeak dana emoten deusku, zoriona dakar, Bera osorik emonaz. Orduan, konpartitzea, bakotxak daukanetik emotea da, Beragandik gehiago hartzeko bide bakarra. Zer emon geinke guk, nun prestau geinio Jesusi jaiotza bat, poza, bakea, laguntzaren bat emonaz? (Isildu eta konpartidu)

b)  Jesusek ez dakar diruzko loteririk, baina bai loteria guztiak baino gehiago betetzen dauan zerbait: Baina Loteri Nagusi hau ere jokatu egin behar da, berez ez dator loteria, ez hau, ez hori: "Nik urez bateatzen zaituet..Harek Espiritu Santuaz eta suz bateatuko zaitue". ]aungoikoak bakarrik emon leigun loteria: Bere Semea. Hau daukanak nahiko dau; beste gauzetatik gitxiago eukita ere, konforme dago. Zer da Espiritu Santuz bateatuta egotea? Zetan igerten jako holango bati? (Isildu eta konpartidu)

d) Kontuak garbi eukiteko, basarritarrok errez ulertzen dogun argibide bat ipinten deusku Joanek: „Eskuan dauka sardea, larraina garbitzeko, eta garia bere garautegian batzeko; lastoa, barriz, amatau ezin leiteken sutan erreko dau“. Geure ardurea da gure bizitzako garia eta lastoa bereiztea, apartatzea. Horretarakoxe da, izan ere, abendua eta abenduan Bizian Gorak jarten deuskuzan aukerak. Bizitzara begiratuta, kendu beharreko lastorik aurkitzen dozu zeugan? (Isildu eta konpartidu)

OTOITZA: Jesus Jauna, nigana jatsi eta etorri gura dozun Salbatzaulea! Zatoz! Mila bider eta bihotzez dinotsut“ Zatoz! Zatoz! Badakit etorri gura dozuna, neuk baino ere gehiago. Gehitu nigan Zugana zabaltzeko egarri bizia. Aurtengo ABENDUA   benetan hartu eta ospatu gura dot. Lagundu egidazu.

ABENDUKO IV. DOMEKEA “C”   

SARRERA

1. Oso garrantzitsua da honako hau: Jaungoikoaren eritziak eta bideak ondo ezagutzea; bestelan, ezin izango dogu Beragaz topo abenduko bidean: Bera datorren bidea ondo ezagutu eta bertatik abiatzen ahalegintzea, hauxe da abenduko eginkizuna.  Beste guztia azal-itxurak, doinu eta jolas gustokoak izango dira; baina guzti horreek, onak izanik ere, ez dira nahiko gugan Jesusen  "jaiotza" gertatzeko. Azala, itxurea… baina Jaunaren misterioak barru sakonean gertatzen dira.

2. Sarri esan ohi dogu: Kontsumoko bonbonkeriak kristau jaiak eta ospakizunak gauzeztandu, barrutik hustu egiten dabezela: sakramentuak, jaiegunak, baina gehien GABON aldiko jaiak eta ospakizunak. "Zorionak" iragarki asko baztarretan, argi ugari bris-bris, jai-saltsa nahibeste; baina Jesusen Jaiotzako misteriorari ikuturik ere ez. Halako parrokiako horma baten agertzen zan zerau: Ume Jesus txanpan-kopa zabal baten sartuta, eta alboan holan inoan: "Kontuz, ez ito umea!". Txanpan-kopak ondo dagoz, baina bihotzak betetzeko, beste zerbait gehiago behar  da. Eta gu horren bila gabiltz.

. Jainko, nire Jainko zaitut, goizetik bilatzen zaitut.
Zure bila, barriro bizira deitzen deustazun horren bila.
Zure bila, nire bizia bizkortzen  eta birbizten deustazun horren bila.

. Zure bila, nire bihotza argira zabaltzen dozun horren bila,
eta beti adi eta arduraz egotera
deitzen deustazun horren bila.
Zure bila, beti zeure aurrean pozik eta beterik
ikusi nahi nozun horren bila. 

. Zure egarri naz, zure maitasunaren egarri.
Zure egarri naz, zure bakearen eta parkamenaren egarri.
Zure egarri naz, zure garbitasunaren  eta alaitasunaren egarri.
 

JESUKRISTOREN BARRI ONA SAN LUKASEN LIBURUTIK : Lk 1, 39-45 

        Aldi haretan, Maria jagi eta bizi-bizi mendialdera joan zan, Judeako herri batera; eta Zakariasenean sartu, eta Isabeli agur egin eutson.
        Mariaren agurra entzun ebaneko, Isabeli salto egin eutson umeak sabelean. Isabel Espiritu Santuaz bete zan, eta honan esan eban oihu haundiz: “Bedeinkatua zu emakumeen artean, eta bedeinatua zure sabeleko frutua. Nondik niri neure Jaunaren Ama nigana etortea? Zure agurra nire belarrietara heldu orduko, salto egin deust umeak pozez sabelean. Zorionekoa zu, sinistu dozulako: Jaunak beteko dau esan deutsuna!” 

a) Mariak beragan dauka seintxoa; halako arazoa eta ardurea! Baina, batez ere, halako poz-jarioa! Halan ere, bere buruaz ahaztuta, Elisabete lehengusinari laguntzera doa; eta zelango poza bere etxean sartuaz bat: "Mariaren agurra entzun ebaneko, Isabeli salto egin eutson umeak sabelean". Maria poza dariola; jaki­na, barruan eukan iturria. "Gure aitita edo amama poz-iturri da etxean, auzoan, parrokian..." Gura zeunke hori zeugaitik ere esan eta entzutea? Zer egin horretarako? (Isildu eta konpartidu) 

b) Bakotxak barruan bizi doguna ateraten dogu argitara: gogo, asmo, egarri, eritzi, amets...Kris­tau sinismena da zoriontasun-iturririk garden ugariena: "Zorionekoa Zu, sinisten dozulako; Jaunak beteko dau esan deutsuna". Sinistea zera da: Esan deutsona aintzat hartu eta bere aldetik beteten ahaleginduz. Sinistea bizia pozez eta indarrez betetea da. Besteak poztuz, norbera pozez bete. Poz-egarri diran beste batzuengana ere eroan geinke gabonaldiko zoriontasun  hori? Zelan? (Isildu eta konpartidu) 

OTOITZA. Ate-joka zaitugu, Jesus laztana! Zain gaukazuz; Zeuretzat da nire etxeko tokirik ederrena. Zu barik, Gabon-jaiak ilunak eta hutsak dira guretzat. Zugaz batera zoriona eta bakea dator gugana. Gure etxeko mahaian leku bat hutsik eukiko dogu: zatoz, zeurea da. Zuk ezin dozu jan-edan, baina bai zure ordezko dan behartsu edo eskekoren batek. Zuri tokatzen jatzuna emongo deutsogu. Jesus ona, bedeinkatu gagizuz etxe eta auzo, baita gure BIZIAN GORAko anai-arreba guztiak ere. Zeure izenean, GUZTIOI ZORlONAK!

JESUSEN JAIOTZA  

SARRERA
ABESTIA

1.  Belengo Jainko txikia, bai haundia! Guk asmatzen dogun Jainko haundia, bai txikia!. Gizonak itxaroten eben Mesias, armaduna zan, geure arerioak zapaltzen lagunduko euskuna; Mesias jakituna itxaron, eta berbetan ez dakiana agertu; geure gatxak eta ezinak kenduko euskuzana itxaron, eta geu baizen gauzeztana agertu. Eta, jakina, holangoa-rentzat ez dago ostaturik, ez orduan eta ez orain! Guk dogun Jainko-irudia aztertzeko aukerakoa dogu Belengo Ume txikia. 

2. Eta guk behar dogun Jainko Salbatzailea, maitagarria, geure tamainokoa, Belenen agertu jakuna da. Ez da bildurgarria, maitagarria eta salbagarria baino. Belengo Jainko jaiobarriak hankazgora ipinten deuskuz gure uste eta pentsamolde guztiak. Ea bada, ez daigun Ume hau apainkeriz eta azal-huskeriz jantzi; hartu ta besarkatu daigun Bera, dan besteko samur ta gurina. Aitita-amamak ilobakaz errezu bat egiten dabe; baleiteke Belengo Txikiagaz ere hartuemon samurrak izatea. Bera asmo horregaz hurreratzen da gugana. 

. Bedeinkatzen zaitut, Jauna,
bihotza pozez gainezka;
gau ta egun, bai lanean, bai atsedenean,
Zu goraldu nahi zaitut.

. Ene Jainko, herri guziak goraldu zagiezala;
herri guztiak goraldu dagiela zure Izena eten barik;
zure bila ibili naz, Jauna, eta orain pozik daukat bihotza,
nire bildur eta esturetatik askatu nozu-ta.

. Nire begiak Zuri begira daukadaz
eta zure argitan pozez betetzen dira;
zoriontsu sentitzen naz, bakez nago,
Zu goralduten zaitudanean.

JESUKRISTOREN EBANJELIOA SAN JOANEN LIBURUTIK:  Jn 1, 1-18

Hasieran bazan Berbea; eta Berbea Jaungoikoagaz zan; eta Jaungoikoa zan Berbea. Berba hau hasieran Jaungoikoagaz zan. Dana Berbearen bidez egina da; eta egindakoetan ez da ezer Ha barik eginik. Haregan zan bizia. Eta bizia gizonen argi zan. Argiak ilunpetan argi egiten dau; baina ilunak ez eben Ha onartu. Berbea zan mundura etorritako gizon guztiak argitzen dituan benetako argia. Munduan egoan; eta mundua Haren bidez egina da; baina munduak ez eban ezagutu. Bere etxera etorri zan, eta bereak ez eben onartu. Onartu eben guztiei, barriz, Jaungoikoaren seme izateko eskubidea emon eutsen, Haren izenean sinisten badabe.

Honeek ez dira odoletik sortu, ez haragiaren nahieratik, ezta gizonaren nahieratik ere, Jaungoikoagandik baino. Eta Berbea haragi egin zan, eta gure artean jarri eban bizilekua; eta geuk ikusi dogu Haren aintza, Aitaren Seme bakarrari dagokion aintza, graziaz eta egiaz betea.

a)      San Joanek, bere Ebanjelioaren hasieran, Jesusen misterio osoaren laburpena eskeintzen deusku. Baina kontua ez da Jesus Bera bai edo ez; Jesus eta gu baino. Guk hartu edo itzi beharrekoa da, Berari bizitzako atea itxi edo atez kanpo itzi: “Bere etxera etorri zan eta bereak ez eben onartu” Ikusten? Gaurko kritsinau askoren antzera: ez dagoz Eleizearen kontra, Eleizearen kontran baino; ez Jainkorik, ez Eleizarik ez balego lez bizi. Jesus Jaungoikoraen Semea gutar egin danetik gora, ez dago neutral izaterik; hartu edo itzi, kunplimentu gitxi.  Bizian Gora zabiltzanetik, Jesus hurrago, etxekoago egiten jatzu?. Lagundu deutsu ezagutzen, Beragaz hartuemon maitekorrak egiten? 

b) Jaungoiko haundia hain txiki eta gauzeztana eginda agertu jaku... Bai, ba, inok bildurrik hartu ez dagion, guganaino maitasunez egindako bidea, eta guk Berarenganaino ere maitasunezko bidea egitea gura dau. Horretarako goi-argiak argi egin behar deusku. Sinismen argia da beharrezko Belengo misterioaren edertasuna dastatzeko.  “Haregan zan bizia. Eta bizia gizonen argi zan. Argiak ilunpetan argi egiten dau; baina ilunak ez eben Ha onartu”. Begiak itxi edo eta argitatik ilunpera ihesi egin..., eta ez dagoala argirik esan! Zer deritxazu? Gizakia, arpegiko begiz lez, bihotzeko begiz ere egia ikusteko da; baina argiari harrika jardun, edo eta argiari irri eta barre egiten deutsonak zer erakusten dau? Eta ni, zu, hori, gu argizale gara? Bizian Gorak emon deusku argirik? Zetan? Argi horrek poza ala bildurra emoten deutsu?

d) Jesus Jainko Semea gizatu eta gero, ez dogu Jainko bila inora joan beharrik; geugan dago, eguneroko gorabehera txikienetan, edozein unetan topez egiten dogu Beragaz. Jakina, kristau gehienok fede-bizitzan miopeak jota gabiltz: hain hur-hurrean, hain barru-barruan egon, eta ezin dogu Beragaz bat egin: “Berbea haragi egin zan, ta gure artean jarri eban bizilekua” Aurkitu dot Jesus nire bizitza barruan?  Gure Bizian Gora taldea Jesusen bizileku da? Zetan igarten deutsozu?

OTOITZA: Gugana geure antzeko eginda zure Semea bialdu deuskuzun Aita Ona! Hau Gabon-saria emon deuskuzuna! Mariagana lez, bialdu gugana ere Espiritu Santua, Berak atondu eta garbitu dagiala gu bakoitzagan Jesusen bizilekua. Erakutsi eiguzu, Aita, Zeuk gugan gorde deuskuzun opari zoragarri hau; munduko ondasun guztiak hautsa besterik ez dira bere ondoan. Zeuk argituta, ezagutu dagigula Jesus, eta Berari entzunaz eta  jarraituaz, heldu gaitezala Zeugana.

GARIZUMAKO V. IGANDEA B 

 SARRERA 

1. Gizonaren bizitzaldia bai laburra! 100 urtera iritsi ezkero... ! eta zer da, ba, 100 urte, munduaren hasieratik azken egunera bitartean? Eta munduaren kondaira osoa ere zer da Jaungoikoaren izate amaigabearen ondoan? Jakina, hau guretzat misterioa da. Berdin da misterioa Garizuman Jaunak eskaintzen digun salbamena, parkamena, egiten digun dei berria. Misterioa ez da ulertzen ez duguna bakarrik; Jesusen esanera, maitasuna den Jainko Aita-Amaren aurrean jarri, Berari entzun eta gogo beroz erantzutea. Orduan egiten da misterioa ikusgarri 

2. Ez daukagu zertan beldurtu gure bizitzaldian honenbeste nahasteborraste ikusten dugulako. Haundiagorik izan da munduan! Baita izango ere! Jaungoikoak erabakita daukan orduan eta moduan gertatuko da dena. Hau jakiteak gure bihotza baretu eta adoretu egin behar du. Eta alperriko laino-jorran ibili gabe, gaur eta hemen egin behar duguna itxaropenez eta gogo beroz egin. Hau da gaur eta hemen gure eskuan daukaguna. Gainerakoa Aitaren eskuetan dago; utzi dezaiogun Jainko izaten. . Entzun ezaidazu, Jauna. Adi egon zakizkit, deika nagokizuu. Zurekin egotera natorkizu eta zure ondoan gelditzera. . Zure aurrean isilik nago, Zuk nire bizitzaren berri ongi dakizu eta. Hemen naukazu, Jauna, hona nire bihotza den modukoa: Zure begi zolien aurrean ezertxo ere gorde gabe. Hemen naukazu buztin berria bezala, zure esku errukitsuak noiz moldatuko zain. . Nire bihotza inolako zatiketa gabe, osorik zurea izan dedila. Bihotz-bihotzez eskerrak Zuri, Jauna, ene Jainko. Beti esango dizut: Zu nire lagunik zintzoena zerala. 

3. JESUKRISTOREN EBANJELIOA SAN JOANEN LIBURUTIK: Jn 12, 20 – 33 

Aldi hartan, jaia ospatzeko igo zutenen artean, baziren greziar batzuk ere. Hauek Galileako betsaidarra zen Feliperengana hurbildu ziren, eta eskabide hau egin zion: “Jauna, Jesus ikusi nahi genuke”. Felipe Andresi esatera joan zen. Andresek eta Felipek Jesusi esan zioten. Jesusek erantzun zien: “Iritsi da Gizonaren Semea goratua izateko ordua. Bene-benetan diotsuet: Gari alea lurrean erori eta hiltzen ez bada, bakarrik gelditzen da; baina hiltzen bada, ale ugari ematen du. Bere bizia maite duenak galdu egingo du; eta bere bizia gorroto duenak mundu hontan, betiko bizitzarako gordeko du. Nire serbitzari izan nahi duenak, jarrai bezait; eta Ni nagoen tokian, hantxe izango da nire serbitzaria ere. Nire serbitzari egiten dena, goratu egingo du nire Aitak. Orain larri dago nire barrua; eta zer esan? Aita, atera nazazu ordu honetatik? Baina hain zuzen, honetarakoxe etorri naiz Ni, ordu honetarakoxe! Aita, goratu ezazu zure izena!” Orduan hitzhots bat entzun zen zerutik: “Goratu dut eta goratuko dut berriro ere”. Han zegoen jende taldeak, hots hori entzun zuenean, trumoi hotsa zela zihoen; beste batzuk, berriz, hau zihoen:”Aingeruren batek egin dio hitz”. Jesusek, ordea, esan zien: “Nigatik ez, zuengatik izan da ahots hori. Oraintxe da munduaren auzia; oraintxe botako dute kanpora mundu honetako nagusia; eta Nik, lurretik gora jaso nazatenean, Neregana bilduko ditut guztiak”. Nolako heriotzaz hil behar zuen adierazten zuen horrela. 

GOGOETA 

a) Garizumaldian -eta horrlako aukera ederrak izan ezkero, batez ere!- Jesus ezagutzeko gogoa guregan biziagotu egiten zaigu: "Jauna, Jesus ikusi nahi genuke". Nolako poza Jesusen bihotzean! Aitaren Espiritua badabil bihotzetan argi egiten. Jesusen lagunengana hurbildu ziren. Haien bitartez, Felipe eta Andresen bitartez, Jesusengana iritsi ahal izan zuten. Gaur ere Jesusek bitartekoak behar ditu. Ezagutzen duzu gaur Jesusengana hurbiltzeko biderik, lagunik, talderik? Non? Bizian Gora zer deritzaizu?

b) Orduan ere, jendea Jesusen bila eta Jesusen aurka; Jesusek zirkin eragiten du. Jesus ezagutu eta jarraitzea, bere Erreinuaren alde jokatzea da:"Bere bizia maite duenak, galdu egingo du; eta bere bizia gorroto duenak mundu honetan, betiko bizitzarako gordeko du". Jesus ez dabil jende-multzoaren bila, ahal denik eta biderik errazenak eskainiz. Bide zuzena, garbia, Aitaren gogokoa da bere bidea. Bizia maitatu, bizia gorrotatu... Hemen gorrotatzea zera da: norberekeria alboratu, une bateko atseginez zorabiatu gabe jokatu; orduan bizia galtzea ez, baino, bizi ederrago bat irabaztea da. Ulertzen al diogu Jesusi? 

d) Jesusen bidea aldatzgora da, baina ez dago BIZITZARAKO besterik. Esanak esan, hauxe da gizaki heldua, betea, osokoa izateko bide bakarra. Eta Jesusek gizaki helduak nahi gaitu, ez txontxongilo batzuk, haizetara dabiltzen txoriak bezala. Jesus bere Aitak goratzen du, baina gurutzean jasoa izanda gero: “Ni lurretik gora jaso nazatenean, Neregana bilduko ditut guztiak” “Neregana bilduko” : Jesus bizitzako ardatz izango dut. Garizumarako horra Maisu bakarra. Bizian Gora egokia al da kristau jubilatuak Jesusengana biltzeko? Zer deritzaizu? Zu zerori nola bildu zintuen? 

 OTOITZA: Gurutzetik deika zaitudan Jesus laztana! Harrituta naukazu horrenbesteko maitasunez. Neronek ere "ikusi" nahi zaitut, ezagutu, gero eta gehiago maitatzeko. Besteen zerbitzari izanez, zure jarraitzaile izan nahi dut. Har nazazu zeure serbitzuan eta lagunen artean. Gaurtik aurrera Zu izango zera lagun maite eta nire ondasun

GARIZUMAKO IV. IGANDEA B 

SARRERA 

1. Munduko kondaira osoa eta gizabanakoaren bizitza osoa Jaungoikoaren aldetik salbamen-kondaira da. Hortxe egiten dugu pekatu eta hortxe -kondairaren barrutikeskaintzen digu Jaunak salbamena eta luzatzen digu bere eskua. Baina norberak eskuak eta bihotza zabaldu eta luzatu behar Berarengana uste osoz. Jaunak ahaleginik asko egin du gu salbatzeko; baina “gu gabe sortu gaituenak, ez gaitu salbatuko gu gabe”. Jaungoikoak ezin du egin gugatik egin duena baino gehiago: Semea emateraino. Garizuman, batez ere, agertu behar dugu Berari erantzuteko zeinbat egiteko prest gauden. 

2. Jaungoikoak bere Semea gu salbatzera bidaltzea, horra salbamen-kondairaren gailurra; eta Garizumaldian eta pazkoaldian Jesus horrexen jarraipenean ipintzen gaitu Eliz Amak. Jesus bide denetan dago: bide onetan, aspertu gabe aurrera egin dezagun laguntzen; okerrean bagabiltz, zuzenera deika, errukiz bidera atereaz. Jauna eta gu bakoitza elkarren bila Garizuman..., hau bai jokabide zuzena eta onurakorra! Zer deritzaizu? . Nire bihotza behartsu sentitzen da, Jauna, lurreko hautsaren pareko. Jar itzazu, Jauna, zure eskuak, zure bihotza nire mixerian, eta bete zure errukiz nire bizia. Zaindu nire bizia, salba nazazu. Zuregan dut uste on. . Niretzat nor eta zer zeran agertu nahi dizut: Zu zera nire Jainkoa, nire Aita zera, Zuk maite nauzu, Zuri deika naukazu egun osoan. Hau pozgarri da, zure lagun izan nahi duenarentzat, nire konfiantza Zuregan jarri dut eta. . Nik badakit Zu ona zerana eta parkatzen didazuna. Badakit errukitsu zerana, bere bihotza zure maitasunera eta leialtasunera irekitzen duenarentzat.

 JESUKRISTOREN EBANJELIOA SAN JOANEN LIBURUTIK ( Jn 3, 14-21) 

Aldi hartan, Jesusek esan zion Nikodemori: “Moisesek basamortuan brontzezko sugea jaso zuen bezala, hala izan behar du jasoa Gizonaren Semeak, Haregan sinesten duten guztiek betiko bizia izan dezaten. Izan ere, hain maite izan zuen Jainkoak mundua, bere Seme bakara eman zion, Harengan sinesten duenik inor galdu ez dadin, betiko bizia izan dezan baizik. Jainkoak ez baitzuen bere Semea mundura bidali, mundua kondenatzera, haren bitartez mundua salbatzera baizik. Harengan sinesten duena ez dago kondenatua; sinesten ez duena, berriz, kondenatua dago jadanik, Jainkoaren Seme bakarraren izenean sinetsi ez duelako. Hauxe da kondenazioaren arrazoia: argia mundura etorria dela, eta gizakiek ilunpea nahiago izan dutela argia baino, haien egiteak gaiztoak zirelako. Izan ere, gaizki egiten duenak gorrotoa dio argiari, eta ez dator argitara, bere egiteak agirian gelditu ez daitezen. Egiaren arabera ari dena, berriz, argitara dator, bere egiteak Jainkoak nahi duen bezala eginak direla agertu daiten”.

 a) Bizia sortu eta argitaratzea, atsegin-atsekabeen frutua da. Gero eta gero ere, dena da biziaren alde. Beste horrenbeste Jainkozko bizitzaren inguruan ere: "Hain maite izan du Jaungoikoak mundua: bere Seme bakarra eman dio". Txatal bietan Jaungoiko Beraren tamainuko maitasuna agiri da: ezin gehiagoan. Jaungoikoa maitasuna da, eta ezin du egin ezer maitasunez izan ezik. Aurtengo Garizuman ere berriren berri maitasunez deika datorkigu. Benetan sinesten al dugu hau? Maitasun honetan sinesteak zertara eragiten digu?

b) Eta hor geratu zaigu Jesus Gurutze habean zintzilik eta beso-zabalik gizaldien azkeneraino; eta egin ahalak egin arren, gizonok ezin ditugu Haren besoak bildu eta tolestu: "Moisesek basamortuan sugea jaso zuen bezala, horrela jaso beharra da Gizonaren Semea; sinesten duten guztiak betiko bizia izan dezaten". Eta nork sinesten du Gurutzeko Jesusengan? Bere aurrean erabakiak hartu eta maitasunez betetzen saiatzen denak. Nik neuk zer leku ematen diot Jesukristo Gurutzekoari? Ba al daukat Berarekin maitasunezko harremanik? 

d) Jaungoikoak salbatu baino ezin dezake egin, maitasuna delako; kondenatzen denak bere burua berak kondenatzen du, maitasun bidean sartu ez delako. Gaurko ebanjelioak argi baino argiago esan digu: “Hauxe da kondenazioaren arrazoia: argia mundura etorri dela, eta gizakiek ilunpea nahiago izan dutela argia baino, haien egitedak gaiztoak zirelako”. Orduan gure eskuan dago salbazioa? Bai, Jaungoikoak lagunduta; Berak bere aldetik egin beharrekoak eginda dauzka, gure erantzunaren zain dago. Nola sentitzen zera honen aurrean?

OTOITZA: Bai haundi, zabal, sakona zure Bihotza, Zeruko Aita! Zeure Semea emateraino maite izan gaituzu. Arren, sinets dezagula! Bai neurtu-ezinekoa zure maitasuna, Jesus Gurutzekoa! Odola ta bizia eman dituzu, gu salbatzearren. Arren, sinets dezagula! Maitasun hutsez sortu eta berrerosiak geran ezkero, maitasunez bizi gaitezela

GARIZUMAKO III. IGANDEA B 

SARRERA 

1. Kristau izatea maitasun-bidean planteatu behar da, ez lege-bidean. Jainkoari zer atsegin eman genezaioke lege batzuk betetzeaz, lege-bidez Berarekiko maitasunbizitzara sartzen ez bagera? Legea, arauak, erritoak etabar biderakusle eta lagungarri dira, ez helburu. Lege-betetzailerik onena izan daiteke, maitasun-bidean pausorik aurrera eman gabe. Garizumako bidea maitasun-bidea da, aurrean dugun Jesusi jarratzea delako. 

2. Garizumako ekintza eta jardunaldi guztien helburua bizitza da: Jainko-semealaboi dagokigun bizitza. Gaixorik dagoen gorputzean egiten diren ebakuntzen antzeko zer batzuk egin behar ditugu espiritu-bizitzan ere, sendatuko bagera. Egiazko osasuna eta salbarnena ederregiak dira, huskeri batzuen trukean iristeko. Garizumak ez du betetzen bere eginbeharra, bijili-barauak eginez, Jesusi orpozorpo jarraitzeaz baizik. Garizuma ez da amaitzen Ostiral Santuz, Berpiztu den Jesusi urtean zehar azkenera arte jarraitzen du, biziberrituta. . Jauna, gure ihesleku Zu izan zera gizalditik gizaldira. Zuk ez dakizu zer den denboraren pisua, Zer diren adinaren arrakalak, eta zahartzaroak astiro eta maitekiro gero eta estuago eransten digun gerrikoa. . Mila urte Zuretzat begi-bristada baino hutsago dira, izatearen betetasuna duzu Zuregan; ez erlojurik, ez ordurik, ez ezertako neurririk ez duzu; ez duzu begira inongo begirik, ez ispilurikl. . Erakus ezaiguzu, Jauna, ihes dijoan denborari bihotz onez begiratzen. eta bihurtu zaitez guregana, denborarik ez duzun Jainko hori, zure betiko maitasun-aulkitik.

 JESUKRISTOREN EBANJELIOA SAN JOANEN LIBURUTIK: Jn 2, 13 – 25 

Aldi hartan, judutarren Pazkoa hurbil zegoen, eta Jesusek Jerusalenera igo zuen. Jauretxean, idi, ardi eta uso-saltzaileak aurkitu zituen, eta dirulariak eserita. Zigor bat lokarriz egin, eta jauretxetik bota egin zituen denak, ardi ta idiekin, diruak sakabanatuz eta mahaiak irauliz. Eta uso-zaltzaileei esan zien: “Kendu hoiek hortik! Ez bihurtu merkatu-etxe nire Aitaren etxea”. Eta ikasleak, idatzita dagoenaz gogoratu ziren: “ Zure etxeaganako maite-minak jango nau”. Orduan, judutarrak, tartean sartuta, esan zioten: “Ze ezaugarri ematen diguzu, hori egiteko?” Eta Jesusek: “Honda ezazue jauretxe hau, eta hiru egun barru jasoko dut”. Judutarrak erantzun zioten: “Berrogeita sei urte behar izan ziren, jauretxe hau egiteko; eta zuk hiru egunean jaso?” Baina Jesusek bere gorputzaren jauretxea esan nahi zuen. Hilen artetik berpiztu zenean gogoratu ziren ikasleak honetaz, eta sinetsi zuten Liburu Santuak eta Jesusek esandako hitza. Pazko jaietan Jerusalenen zegoen bitartean, askok sinetsi zuten Haren izenean, egiten zituen ezaugarriak ikusita. Baina Jesus ez zitzaien guztiz irekitzen, denak ezagutzen zituelako; ez zeukan Harek gizonaren berri inok eman beharrik, gizon bakoitzaren barruan zer dagoen bazekielako.

 GOGOETA 

a) Aitaren Erreinua, etxea, izena...guzti honek Jesus irakitzen ipintzen zuen, behar ez den moduan erabiltzen ikusten zituenean: "Zigor bat lokarriz egin, eta jauretxetik bota egin ziuen denak: "Kendu horrek hortik! Ez biurtu merkatuetxe nire Aitaren etxea". Gure parroki bizitzak ba ote dauka horren antzik? Zer da gehiago: merkatu-etxe ala Jainko-etxe? Azoka baten nola jokatxen da? Eta gure arteko Jainko-etxe baten? Zer egin eta zer kendu Aitaren Etxea merkatu-etxe izan ez dadin?

b) Ebanjelio-txatal hau beste toki askotara zabaldu daiteke: familiara, gure talde honetara, geu bakoitzaren bizitzara. Garizumaldia egoki zaigu gure "etxeok" Aitaren Etxe bihurtzeko. Hirutariko Jainko-etxe bakoitzean zer egin nezake Jainko-etxe izan dadin: Famlian, Bizian Gorako taldean eta ni neronengan, bakoitzarengan? 

d) Dena dela, Jaungoikorekin zintzoki jokatu behar dugu; ezin diogu iruzur egin, batekoz-besteko ziririk sartu. Geuk baino ere hobeki ezagutzen eta maitatzen gaitu; horregatik zer egin argi eta garbi diosku bakoitzari, horretarako laguntza eskainiz: “Baina Jesus ez zitzaien guztiz irekitzen, denak ezagutzen zituelako; ez zeukan Harek gizonaren berri inork eman beharrik, gizon bakoitzaren barruan zer dagoen bazekielako” Gaur bertan entzun dezaiogun guregan dugun Jesus maite errukitsuari, sendatu nahi gaitu eta. Zail egiten al da benetan Jesusi entutzea? Zer behar da horretarako? (Isildu eta konpartitu) 

 OTOITZA: Jesus Gurutzekoa! Zure zainetako odolak bris-bris egiten digu bihotzeko begietan. Zu bai zerala Aitaren Etxe bedeinkatua. Zuregan aurkitu nahi dugu Aita. Prest gaude, Jauna, egin behar dena egiteko. Lagun ezaiguzu, arren

GARIZUMAKO II. IGANDEA B 

SARRERA

 a) Bizitza bera da gizon bakoitza norainokoa den agertzeko bidea eta aukera. Batzuetan pozez goraka; bestetan, eta sarriago beharbada, atsekabez eta burumakur. Hortxe, bizitzako lexibak garbitzen gaitu ustelkeri guztietatik. Baina horretarako norberak agertu eta aitortu behar zikinkeriak, zertatik garbitu nahi duen. Norberak nahi gabe, ez dago derrigorrezko garbiketarik. Hau da gaurko akats bat: pekaturik ez; inoren bizitzan inoiz baino gehiago ikusten dugu, baina, gurean... Jesus Maisuaren aurrean jarri gaitezen, ia Bere iritzi eta jarreratik gero eta hurbilago ala urrutiago gauden.

 b) Fedeak ba ote dauka lexibaldi honetan zerikusirik? Zintzoak behintzat bizitzaren joan-etorriaren barrutik jotzen du Jaungoikoarengana; bai goraldietan eta bai beheraldietan. Jaunak gure bizitzan aztertzen gaitu; bizitza azaleko eta okerreko frutuak ez zaizkio atsegin. Geuri ere ez digute onik egiten, ez gaituzte gero eta helduago egiten. Garizuma heldutasuneruntz gogo beroz doazenen aukera da; hor agertzen du bakoitzak norainokoa den Jaunarekiko zintzotasuna. . Zu zera Nazareteko Jesus, gurfeganako Aitaren errukia: Aitak zure maitasunaren bitartez isuri du bere bihotza lurrera, gure artera, eta bere neurrigabeko samurtasunez gure pekatuak garbitu nahi dizkigu. . Pekatu egin dugu zure neurrigabeko maitasunaren aurrean, Aitaren samurtasunaren aurka. Hau egoera mingarria, lotsagarria, zure hainbesteko maitasunari hoztasunez erantzunez. 

JESUKRISTOREN EBANJELIOA SAN MARKOSEN LIBURUTIK: Mk. 9, 2 – 10 

 Aldi hartan, hartu zituen Jesusek Berarekin Pedro, Santiago eta Jon , eta mendi goi batera igo zuten haiekin bakarrik; eta hiruren aurrean antz-aldatu egin zen. Haren jantziak diztiratsu, zuri-zuri bihurtu ziren, inongo zuritzailek zuritu ezin ditzakenez. Eta Elias eta Moises agertu zitzaizkien, Jesusekin hizketan. 2 Pedrok hitz egin zuen orduan, eta esan zion Jesusi: “Maisu, bai ederki gaudela hemen! Hiru txabola egin ditzagun: bata, Zeuretzat, bestea Moisesentzat, eta bestea Eliasentzat”. Ez zekien zer esaten zuen ere; zeharo beldurrak hartuta zeuden-eta. Orduan, hodei bat sortu zen eta estali egin zituen, eta hodeitik ahots bat entzun zen: “Hauxe da nire Semea, nire Maitea. Entzun ezaiozue”. Eta halako baten, haien ingurura begiratu, eta ez zuten Jesus baino ikusi beraiekin. Menditik behera jaisterakoan, ikusi zutenaren berri inori ez emateko agindu zien Jesusek, arik-eta Gizonaren Semea hilen artetik piztu arte. Agindu hori gorde zuten, eta elkarri galdetzen zioten zer izan ote zeitekean hilen artetik pizte hori.

 ============================================================== 

GOGOETA 

a) Jesusen Ebanjelioan zigorra eta amenazua baino gehiago, eztaia, maitasuna, poza, bizi berria ipintzen zaizkigu aurrean. Tabor mendiko eztialdia bai esperientzi gozoa! "Maixu, bai ederki gaudela hemen"! Gure bizitzara begira jarrita, gehinetan tristura, zoritxarra ikusten eta kontatzen ditugu. Hori geratzen zaigu gogoan. Baina, izan, kristauok esperientzi gozorik ere izaten dugu: pertsona bezala, eta kristau fededun bezala. Izan duzu inoiz antzeko gozoaldi sakon beterik zure kristau bizitzan? Non? Nola? 

b) Garizumako ekintza guztiak honetarakoxe datoz: Jainkoarengana hurbildu eta Pazko aldian Jesus berarekin bere antzeko hitzekin gozatzea: "Hauxe da nire semea, nire Maitea!” Honen berri daukatenek diotenez, mundu osoa ere ez da ezer hoerrelako unetxo bateko poz-betekadaren ondoan. Horrelakorik ez da dendetan saltzen. Kristau bizitzak beharrezko ditu horrelako gozoaldi batzuk; hagatik da pertsona pozgarria, itxaropentsua. Hori gabe, kristau tristeak izan behar, iheskorrak, lotsatiak. Zer egin genezake, horelako ezti-tantatxo bat txastatzeko? Ez duzu ezagutzen Tabor mendi antzekorik zure bizitzan?

d) San Pedro eta lagunak prest zeuden bertan txabolaginen hasteko, beren buruarekin ahaztuta. Baina Jesusek ez du nahi txabolarik, geltokirik, abiadan dijoa Aitak erakusten dion bidean aurrera. “Ikusi duzuenaren berri ez eman inori, ariketa Gizonaren Semea hilen artetik piztu arte”. Esan ez, baina beste guztiak igarri bai egingo zien hiru ikasle ikusleei. Jesusek, pozik sakonenaren barruan ere, gogoan dauka bere azkena, Kalbarioa, hara arteko bide latza. Gozoaldiak ez dira bertan gelditzeko, biderako indar-iturri baino. Bizian Gorako bidean izaten ditugu horren antzeko gozoaldiak Jesusen ondoan. Bagoaz barruratzen pozezko esperientzi hoiek, gero beste arpegi batekin agertzeko? Konta itzazu horrelako batzuk, elkar gogoberotzeko.

 OTOITZA: Gure zeruko Aita! Egin ahalak egin dituzu guri diguzun maitasuna agertzeko. Batez ere, zure Seme Jesusen bitartez. Berarengan entzuten dugu geuretzat esanda bezala, zure Aita-bihotzaren agerpen hau: "Hauxe da nire semea, alaba, nire maitea". Zer egin guk, Aita, zuri maitasunez erantzuteko? Argi ezaizkguzu, arren, gure bihotzeko begiak, zure maitasun-dohai eta eskaintza hauek gogoan erabiliz, zure seme-alaba izateaz poztu eta bizi berriz bete gaitezen

GARIZUMAKO l. IGANDEA B 

SARRERA

 1.GARIZUMA... Guk nagusiok gogoan ditugu lehenagoko garizumak zekartzan ondorenak, eginbeharrak: Bijiliak, barauak, elizkizun luzeak, gurutzbideak, sakramentuak, mixinak.. Eta dantzak, erromeriak eta antzeko zerak uxa. Gaur egun zer da Garizuma? Guk nolako Garizuma nahi dugu eta zertarako? Bizian Gorako kideok behintzat Garizuma gaurko giroan bizi behar dugu, Jesusi geertuagotik jarraituz. 2. Gizakia mugikorra, aldakorra da; zintzoa izatekotan, sarri sortzen zaigu bideak zuzendu eta gogoa bizkortu beharra. Modu batera edo bestera, baina Garizumaldi bat beharrezkoa dugu gaur ere. Berez eta erraz jotzen dugu lasaikerira, Jesusen bideak alde batera utziz, kristaubide garbitik alboratuz. Kotxeak ere noizean behin ITVra eraman behar izaten dira. Eta guk geure burua ez? Ala zuzendu beharreko zerbait agertuko ote zaigun beldur? Jauna, ni onik atera. Jauna, zatoz laister ni laguntzera. Aska nazazu sufrimendutik, beldurretatik, hondamenditik, poixkanaka hondatzen dijoan bizikeratik, eta heriotz-zulo ilunetik. . Ondasun hutsa zeran Aita, zatoz! Salbu nazazu nere eta besteen txarkeritik. Ene Jainko, zatoz! Emaidazu zure indarra. Erakus ezaidazu sufritzen, eta nere zoritxarrei aurre egiten.

 JESUKRISTOREN EBANJELIOA SAN MARKOSEN LIBURUTIK: Mk1, 12 - 15 

Aldi hartan, Espirituak basamortura eraman zuen Jesus. Berrogei egunez egon zen basamortuan, eta Satanasek tentaldian ipini zuen; basa-piztien artean zegoen, eta aingeruak zeuzkan serbitzari. Joan preso sartu zutenean, Jesus Galileara joan zen, Jaungoikoaren berri ona iragartzera; eta hauxe esaten zuen: “ Ordua bete da, hurbil da Jaungoikaren erreinua. Bihotz-berri zaitezte eta sinetsi berri ona”

 A) Barau eta bijilia egitea beti dago ongi; baina zergatik edo zertarako egin? Espiritu Santuak eraman behar gaitu sakoneko bizitzara: "Espiritu Santuak basamortura eraman zuen Jesus". Basamortua: bakarrean eta isilean geu Jaungoikoaren aurrez-aurre jartzeko. Eta honek leku, ordu eta giro bereziak eskatzen dizkigu: Zer izango litzateke gaur guretzat basamortura Jesusekin joatea? (Isildu eta konpartitu) Garizumaldian leku, giro, jardunaldi bereziak behar ditugu “bihotzberritzeko”. Tentaldiak izateraino jokatu behar dugu. Nolako tentaldiak izaten ditugu Garizumaldian Jesusi jarraitzeko orduan? 

 B) Zeinbat garizuma joan zaizkigun bizitzan! Nolako esperientzia daukagu? Eta aurten zer? Gerotik gerora luzatzen joan? Gogora gaurko Jesusen larrialdiko deia: "Jesus hauxe esaten hasi zen: "Ordua bete da, hurbil da Jaungoikoaren Erreinua. Bihozberri zaitezte eta sinetsi Berri Ona". "Ordua bete da". Zer diosku honek? Ze ordu esan nahi digu? Nondik datorkigu dei hori? 

 D) Ez da dei hutsa; deiari erantzuten dionarentzat itzelezko ondorena: “Hurbil da Jaungoikoaren Erreinua? Aitaren esanera jartzen bagera, zorionekoak izango gerala. Hori da Aitaren Erreinua: Jesusen antzera, bere bihotz beteko seme-alaba izatea; geure artean sekulako bake eta bizipoza txastatzea. Eta zoriontasun hau ezin da eskuratu, Espiritu Santuaren eraginez eta geure ahaleginez baino. Benetan jokatzen duenak jasoko du saria. Hori bakarrik pozez beteko da Pazkuetan, Jesus Berbiztuarekin batera: harako bidean Berari jarraitzen diona. Fiatzen al gera Jaunaren eskaintza honekin? Zeinbat jokatzeko gaude prest?

OTOITZA: Gurutzean gugatik hiltzeraino iritsi zinen Jesus maitea! Jaso dugu zure dei-gonbitea: "Zatozte Nedekin batera, pekaturako hil eta Aitaren bizi berriz betetzera". Eskerrak Jesus, gonbite haugatik! Aurtengo Garizuma benetan hartu nahi dut. Bai, niretzat ere "ordua bete da". Nahiko denbora eman dut erdizka zure atzetik. Lagun ezaidazu, katigu guztietatik askatu eta pozik jarraitu dezaizudan. Oraingoan nahi dut, Jesus Jauna